Glocal International Film Festival nung ‘Axone’ sayu

Glocal Hornbill International Film Festival sentong nung Axone team tangokba noksa ka yangi angur. (Kohima Dec. 05, 2019)

Kohima, Luchii/December 05, 2019 (TYO): Hornbill Festival 2019 benjungmung sentong shilem ama, Hotel Japfü Kohima nung December 05, 2019 Brehostibarnü Glocal International Film Festival sentong tenzükja liasü. Anogo ana tashi agitsü renemba sentong lapoka, kanga dang yongyaba film – “Axone” film sayuogo. Mezüng anogo sentong nung alima tesem balala nungi film tstsütsü talisa Change of Plan, S-He, Midnight Error, Enemy of the State aser tanga film tem sayuogo, ta sangdong ka ajanga metetdaktsü.
Axone film ya North east nungi telok ka Delhi yimti kübok kiyimba sentong ka nung atenba aser parnok aliba ki kibur den mangatetep adokba indang otsü ka lir.
Taküm October ita London Film Festival nung, Axone film sayua liasü.
“London Film Festival sentong nung nübur aika adenshia iba film reprangogo aser iba otsü ajanga India nunger libaliro/yimya indang sayubatem India nunger audience aikati ajangshibtem lemsatepa liasü,” ta film terprangertem den sensaksemba mapang Kharkongor-i ashi.
Audience temi iba film jangratema/tsüratema reprangba indang lemsatepa liasü aser iba film den tatongtep ka yanglutsü bilema liasüng ta asüngdangba mapang, Nicholas-i ashiba agi, “Film tatongtep yanglutsü asoshi, mezüng film ajanga takok tajung angutsü mesüra terprangertem mulung chidaktsütsüji kanga dang tongtibang lir.”
Tongtibang yimti talisa Mumbai aser Delhi nung iba film sayuba mapang, ni iba osang meporoktsü asoshi kanga dang kümdanga bilem, ta Kharkongor-i shisem.
Iba sentong nung Minister, Neiba Kronu-i, “Film yangluba maparen nung Assam aser Manipur naprongla kanga tejaklen oadaki saka kechi maparen asüyongjia tetenzük/tajemedak kabo lir. Tawa- tanü asenoki sentong tapu balala ayongzüka agir saka film festival yabo jangratemtsüka lir.”
“Iba bioscope ajanga alimai asenok tali jangjar. Movie tem ajanga asenok jashidaktsür, peladaktsür aser ajungmesor, saka asenok lokti sasep nungbo, iba ajanga asenok nem tangazüktsü agütsübaji tongtibangtiba lir,” ta Kronu-i ashi. Kasa sentong nung, Director IPR, Limawati-ia, State nung film production maparen ajanga ajangzüktsü aser kasa mapang mapa adoktsü. Film tem ajanga alima dang asenok teshisadangba tajung sayutettsü akok, ta ashi.
kanga dang yongyaba ‘Axone’ film theatre tem nung masayadang, special screening asüba atema Limawati-i Producers Sare Gama dang pelaba metetdakja liasü.
Iba sentong nung Minister, Temjen Imma Along; Advisor, Toshi Wungtung; Advisor, Mmhonlumo Kikon aser tanga tongtibang nisungtem dena liasü.
Iba Film Festival sentong ya Eastern Art Council den Information & Public Relations, Nagaland lungjemer ayongzüker.