G&M Director-i Viphoma yimdak tzübo lapoktsü

Dimapur, April 13 (TYO): Geology & mining department, ‘deep tube exploratory scheme’ sentong kübok Viphoma yimtsüng nung ‘deep tube well’ ka yanglutsüogo.
Iba yimtsüng ya ‘tzüyim level’ nungi metre 1300 ajungketer lir. Department-i iba sentong District timba ka ayimjema inyakogo aser kasa sentong kübok Tseminyu nung taruba ita ‘deep tube well’ ka lapoktsütsü.
Viphoma yimdak 2017 April 12 nü geology & mining director Wenthang Rengma-i ‘deep tube well’ lapoktsü. Iba sentong nung pai o jembidang, tenem kolak nung aliba yimtsüng aser jila timba ka nung tzü agi anüngba aser nüngdakba indang jembi.
Ali telung nung aliba tzü nüngdakba aser iba ajanga lokti aser shishilembabaren nung terenlok bener arutsüba nung koda shilem agir, iba indang pai jembia liasü. Linük tenem limatem rongnung Nagaland-a geology & mining kübok ali telung nung aliba tzü bushitetba aser iba sentong renloka aoba nung takok anguba pai shisem. Maneni pai iba tzübo ajanga ghonda shia tzü litre 3,000 atsütettsü, ta metetdaktsü.
“Ghonda ka nung tzü litre 3,000 atsütettsüsa tesem aika nungbo mangur. Aji saka iba tesem nung onoki ngutetogo aser iba ya yimdaklirtem atema osang tajung lir. Yamala tesem ka bushitetba atema onok kanga pelar,” ta paisa ashi.
Pai maneni tzü atsüba osettem mapang talangka amshitettsü asoshi, oset ketdangsertemi tetuyubatem jungjunga benshitsü asoshi ajungshi.
Wantang Rengma-i ano yimdaklirtem osettem kar nung timtem adok nungbo department den indangindanga tongteptsü asoshi metetdaktsü.
“Iba tzübo ajanga yimdaklir nüngdakbatem peritsütsü aser mapang talangka amshia lokti nem teyari agütsütsü imlar,” ta pai shisem.
Iba sentong Viphoma Baptist Church Pastor, Thepfuvi-U Peya-i sarasadema tenzük, iba sülen V.C.C. chairman N.Vithe-i lokti pelaa agizük. Geology & mining department nungi technical report Khikiya Kath-i agütsü.
Tepela anküp o Chatuo Mere-i jembi aser sentong tembanga Crcviphoma yimtsüng Pastor Pitoshe-i sarasadem. Iba sentong V.V.C. Secretary, Vizielhou Miachieo lenisüba kübok agia liasü.