GMS A&B nung shisatokden aka

Mokokchung, Aami/June 22 (TYO): Tetsür temang anepaluyim (menstrual hygiene management) aser teka metsükba aser merükmejuba (hand washing & sanitation) onük dak sendakba nung shisatokden sentong tajung ka yangi Govt. Middle School A & B Sector Penli ward, Mokokchung nung kaogo.
Iba sentong ya Rotary Club of Mokokchung-i ayongzük. Sentong nung shisalen sayurtemji; Rtn. I Temsu Jamir, Rtn. Dr. Ayangla Saku, Dr. Temsumenla Longkumer par asemi tagitsü aser teinyaktsü o aika bener arua lemsatepa liasü.
Iba sentong nung Rotary Club Mokokchung tir, Rtn. Dr. Takosunep Ao-i shisatokden akaba oki latsü, Penli Ward Chairman Imliyangeri tajungshi o jembia liasü. Sentong nung head teacher Imliwabang menden liasü.
Shisatokden sentongji temer külen tanurtem telok balala küma lemsar teka metsükba yimya (demonstration) ia sayu. Sentong nung Govt. Middle School A & B tanurtem aser tesayurtem den Penli Ward Education Board nungi züngsemtem aser Rotarian pur densema liasü. Rotary Club Mokokhung-i ita ishika jakdang iba school nung ya teka metsükba tesema ka yanglutsüogo.