GMS Alempang küm tenem jungogo

Nagaland Parliamentary Secretary, S.Chuba Longkumer den Government Middle School, Alempang nung inyaker tesayurtem külemi tangokba noksa nung angur.

Mokokchung, Sept 8 (TYO): Mokokchung town nung aliba Government Middle School Alempang tenzüker küm tenem ajungba jubilee sentong ka “Striving for greater heights” omen nung ajemdaker hogulbarnü par school kilem nung meraketa mungogo.
Iba school ya February 27, 1967 küm primary school ka ama lapok, iba ya Alempang aser Dilong ward nati külem sür 1988 tashi anepalua liasü. Aji sür, 1989 nung iba school anepalutsü atema education department-i melaba den ward anasanger tangatettep nung Alempang ward nem amoktsü. Tetenzüklenbo iba school dang ya Chandmari Lower Primary School ta jaba otsü ajanga angazüker.
Tang Government Middle School Alempang nung tezüngdak pur kaketshir 200 shi lir aser Mokokchung district kübok middle school rongnungbo enrollment teimtibaji iba ya asütsü südi. Iba school ya 2011 küm Middle School jenjangi ajungket.
Tanü iba sentong nung tongti tesemdangeri Parliamentary Secretary Wb. S. Chuba Longkumeri jembidang, Nagaland ya azüng-züluba shilem nungbo kümshi jenjang renloka aor, aji saka, asen state ya imlaba ama tejaleni mera maor, anungji, education tsütsü nüburtem mulungsentsü melenshitsüla, ta tayongzükba ka agütsü.
Paisa ashiba agi, kaketrijutem nung degree balala angubaji teperi masü, saka koba tensa tia ajurudir ajuruaka, kaketshirtemi education anguba jagi pei sasa noktaktettsüla. Iba den ano lokti nung temelenshi adokdaktsütsü aser kaketshir ka temaba jenjangi mera aotsü asoshi chijiba education-ji tenüngdaktsü, ta paisa shisem.
Iba sentong nung Area Education Officer Mokokchung Alem Longkumer, Alempang Ward Chairman Rongpangwati, Ward Education Committee Chairman, Limasashi aser tangatemi o tatsütsü jembi. Jubilee amungba nüngtem nung nüngo kaket ka adoka sayaa liasü.