GMS Mkg yimtak alima lendong atalokdang meteta alitsüyim training sayu

Mokokchung, July 31 (TYO): Mokokchung Civil Defense & Home Guard (CD&HG)-i ayongzüka Government Middle School Mokokchung village nung alima yimya lendong balala ajurudang nisung yariba aser kümzükba (first aid & rescue operation) indang training ka parnok school kilem nung katsüogo.
GMS Mokokchung Village bangdaki CD&GH department dang iba training agitsü asoshi mepishia asüngdangba ajanga katsü ta Dy. Controller aser District Commandant CD&HG Mokokchung, Watilembai iba osangbener den jembidang metetdaktsü.
School-tem nung iba amala training agibaji kanga tongtibang lir, kechiyong lendong arutsübaji shingaia ashitsü makok, aji oda, training agir lira mashi mapang nung aser lendong balala atalokdang langzütettsü imlar ta paisa ashi.
‘Mokokchung kübok yimtsüng level nung iba amala training agitsü asoshi asüngdanga katsüba yabo ibai mezüngbuba asütsü’ ta paisa ashi. ‘Yimtsüng tashi nung iba ama telangzüba tajung aruba tetezü joko nüburtemia alima yimya lendong dak sentakba tsütsü metetjema aruba temaitsü sayur’ ta paisa shisem.
Asen lima nung atalokba lendong teimba nisungi yanglubatem alir, anungji, anentsüh nungi kümzüktsü atema pei alidak temeket merükmejua aser kilentsü junga yanglutsüla, iba den ano menoknok nungi kümzüktsü atema kisür mongin den tongtepratepa kiji asütsüla ta paisa inyakdaktsünüba o kar ashi.
Iba den ano asen lima mi lendong yaa teimba light wiring junga maoba nungi adoker, anungji, light wiring-ji kanga junga reprangshima inyaktsü tim ta paisa shisem.
Alima yimya lendongji mashi mapang ka nung ataloktsüa akok, anungji, lendong mapangji yakta sorkar bangdak (district administration) mesüra police den tongteprateptsüla ta Watilembaisa teinyaktsü ka lemsatep.
Tanü iba training nung shilem agirtem 150 shi liasü.