GMS Naga New Model (Ao) Nuton bosti küm 50 jungogo

Dimapur, Luchii/December 11 (TYO): Government Primary School/Government Middle School Naga New Model (Ao) Nuton bosti küm 50 ajungba benjungmong tanü mongogo, aser iba sentong nung tetushi tejaokerji District Education Officer, Dimapur, R Amongla Jamir liasü.
Iba sentong nung jembidang Amongla-i, iba school tanü iba jenjang tashi tongtettsüsa tamalen meranga inyakertem dang pelaba metetdaktsü.
Laisa, school lenla ajaklen terenlok alitsü atema tesayurtem, tsüraburtem, village council aser school management committee ajaki shilem agitsüji kanga tongtibang, ta ashi.
State sorkari school tasen lapoktsü majungshir saka shisaliok tajung agutsütsü atema rangloker inyaker, ta lai ashi.
Iba school ya up-gradation asütsüsa maongka lir, ta shia lai ajak dang iba school ya state nung tatishitsü tajung agitsüsa school ka kümdaktsütsü ayongzük. Tesülen lai Hon Jubilee kaket sayaja liasü.
Iba school tenzüker asürtem bilemteta minute ka shi mokrema liasü.
Tang iba school nung tesayur 18 aser kaketshir 279 lir.
Tanep iba sentong nung Chairman, School Management Committee, T Maong Longchar aser Chairman, Ao Khel Council, Nuton Bosti, Er. I Menang natia jembi aser Head Teacher, Arenkala Aier-i lokti pelaa agizükba o jembia liasü.