GNLA-i Meghalaya ketdangser chiokogo

Shillong, November 03 (Agencies): Meghalaya nung telungpur telok, Garo National Liberation Army (GNLA)-i Meghalaya sorkar ketdangser ka apuba sülen anogo tenet lir Mongolbar anepdang chiokogo, ta police-i ashi.
Garo Hills district kübok Chokpot nung Block Development Officer, Jude Rangku T Sangma kecha meyirutsüi Allagre yimtak chiok, ta Inspector General of Police (western range), FD Sangma-i osangbenertem dang ashi.
“Ketdangserji tanep Tura nung par tsürabur ki tongogo. Tang pa anisüngzükdagi aser tanüsa onoki pa den jembitsü,” ta Sangma-i ashi.
Yimtenren party balala densema nüburtemi pa chioktsü akhangba sülen telungpurtemi telatetba kecha makai Jude chiokogo.
October 27 nü ketdangserji West Garo Hills district headquarters Tura-i aoba mapang GNLA telungpurtemi pa south Garo Hills kübok Diganggre tesem nung apu.
Telungpurtem kanga aliba tesem, Chokpot block nung pa mapa inyaktsü lemzüka liasü. Telungpurtemi pa aiben amokmerena sen khangogo, ajisüaka pai ibaji hau ta melii toktsü.
Ajisüaka GNLA-ibo ketdangser jagi ochimashi mapa inyakba ajanga apu, ta ashir.
Western Meghalaya, Garo Hills nung aliba district tem nung telungpur anema operation aoba anentsüla ta takhangba agüja telungpurtemi pa tepsettsü-a amokmerenogo.
GNLA teloki Meghalaya anüolen tsütsü Garoland jenjang atema akhanger.