GNLA mendenbuba nem bail agütsü

Shillong, Aenjeti 26 (Agencies): Garo National Liberation Army (GNLA) mendenbuba Champion R Sangma nem tawa okadak ajanga bail agüja liasü, saka pa maneni tepuokdak ayutsü, kechiyong pa tanga ken o ka nung aija lir.
Sangma okatsür Sujit Dey-i ashiba agi, Champion nem executive magistrate P K Boro-i Aenjeti 23 nü bail agütsü, saka pa tepuokdak maneni ayutsü, kechiyong pa Mendipathar PS nung benoka aliba ken o ka nung aija lir.
South Garo Hills district kübok Baghmara police station nung 2011 küm benoka aliba ken o atema pa sen lakh 1 agi bail nung agizüktsüba maparen ya kinungtsü Enrita N Marak-i inyak.
Pa 2012 küm Chiteni (July) 12 nü Bangladesh nungi yoka local court nem ken o belenoktsüba sülen Meghalaya Police-i apu
Sessions court ajanga Aenjeti 24 nü police ketdangser aliba nungi telungpur akümsang ya chioktsü asoshi tetuyuba agütsü, shiba Shillong district jail nung linük anem telungpur telok ka kümteter raraba atema aija liasü.
Iba sülen tasüngnü Shillong jail dangi pa mechioktsü asoshi osang ka yok kechiyong pa anema North Garo hills district kübok Mendipathar police station nung ken o tanga ka benoka liasü. GNLA mendenbuba anema ya Garo aser Khasi hills tesem balala nung ken o benoka lir.