GNR nung mezüng drummer Steven Adler par telok den külemi shilem agi

July 07, 2016 : Guns N’ Roses mezüng tenzükba mapang drum atemsang Steven Adler par telok den tanaben lungjema shilem agi. Pai 1990 küm Cincinnati nung kenten sentong ka nung tatembangsa külemi shilem agiba sürbo tan mezüng par telok den shilem agir asütsü.
Arishi küm 51 tain, Steven-i par telok nung ken atensang Axl Rose, guitar atemer Slash aser bass atemer Duff Mckagan nunger den Paul Brown Stadium nung Bodhbar nikongdang kenten sentong ka nung külemi atem.
Iba ‘Not In This Lifetime… Tour’ sentong nung ken ajak nung tang aliba parnok drum atemsang Frank Ferrer-i atema ajisüaka küm 23 pila aliba sülen, July 06, 2016 nü sentong nung Adler-ia Ferrer yarisema ken ana–‘Out Ta Get Me’ aser ‘My Michelle’—nung drum atem.
Alder ya temesepba mozü (drugs) lar asüba ajanga par telok nungi 1990 küm anen aser pa melena Matt Sorum shim.
Guns ‘N’ Roses telok ya aiben mepetmesü agi sünger liasü, ajisüaka taküm April ita California nung Coachella Festival atema lungjemba sülenbo tangatettep tajung nung odar.
Tang parnok telok nung medensemsangji tesüiba mapang rhythm guitar atemsang Izzy Stradlin ang kümogo. Pa-a memunui par telok den külemi shilem agitsü amai angashir.
“Ni April 2016 GNR sentong ka nungdanga madentsü. Ni tanga telok kecha atemaka studio nung ken metangoker mesüra ken mezülur. Kü ket nung osang peria mali,  anungji ni ang bushia aotsüsa akümtsü akok,” ta pai ashi.