Goa & Daman Archbishop-i züluba shidi belensar

Panaji, Aami (June) 5 (Agenceis): Archbishop of Goa & Daman, Filipe Neri Ferrao-i annual pastoral shidi nung linük nung yimtenren tensa ajanga India Linük temzüng lendongbang nung lir ta züluba atema ashishiteper saka Sangtennü (Mongulbar) Goa arogoi pa metentsüogo.
Archbishop-i züluba shidi nung olen ka-ana agiteter onük tulu kümdaktsür, ta Archbishop indang Secretary, Fr Joaquim Loila Pereira-i ashi.
“Bishop-i züluba shidi nungi olen ka-ana agiteter onük tulu kümdaktsür. Onoki iba shidi atema balaka mashitsü, nenoki metetnüra online nung pastoral letter shidiji angutsü aser angatettsü merangang” ta pai osangbener dang ashi.
Amungnü (Deobar) sayaba pastoral shidi nungji India Linük Temzüng lendongbang nung lir ta olen ka shia lir.
Sobaliba ka ta asüba tangatetba ajanga nisung ka achiajemba, sübosolemba, taküm aliba aser külemba nung liromedemnür aser iba ajanga meimchirtem lendong tensa ka nung lidaktsür, ta shidi nungsa shia lir.
“Tanü asen Linük Temzüng lendongbang nung lir, nisung aika sadoksadoka meliteter. Talisa, general elections tonga arudar anungji asenoki Linük Temzüng tali metettsü merangdi aser ibaji kümzüka ayutsü atema talila meranga inyakdi” ta Archbishop of Goa & Daman, Filipe Neri Ferrao-isa shidi nung shia lir.
Kümshia Aami (June) ita nung Archbishop temi pastoral shidi zülur aser state ajungalen aliba arogotem dangi yoker.