Goa-ia Kerala tia ajurutsü: Ecologist Madhav Gadgil

New Delhi, Luroi/August 19 (Agencies): Kerala nung tzümetsüng lendong ya nisungi yangluba lendong ka lir, ta shia kanga nüngtugu Ecologist, Madhav Gadgil-i, mera tapet agia meinyakra Goa-ia Kerala ama kasa tia ajurutsü, ta tekümdangtsü metetdaktsüogo.
Western Ghats Ecology Expert Panel (WGEEP) nung tongti, Madhav Gadgil-i, Kerala nung tzümetsüng lendong ya nisungi yangluba lendong ka lir, kechiyong ozüng alema ayong nung kiojen yanglur aser temelaba makai lisem ayar aser long ateper, ta ashi.
Indian Institute of Science, Bengaluru nung Centre for Ecological Sciences tentetsang, Madhav-isa, “Goa nungbo Kerala nung ama Western Ghats mali, saka Goa-ia item ama timtem ajak ajurutsü,” ta ashi.
Pai ashiba agi, sorkari tentetba M.B. Shah commission-i, ozüng alema lisem ayaba ajanga sen crore 35,000 ajangzükba asadangtetogo.
Tajangzük aika angutsü atema merumerua inyakba mapatem nung tenük meyoker, ibaji ajanga loktiliba nung rongsenkettsüng liro memedemer, ta paisa ashi.
2011 küm Madhav Gadgil-i aniba committee-i Kerala sorkar dang tekümdangtsü metetdakja liasü, saka state nung Congress sorkari tashi manga, iba sülen CPI (M) sorkaria tashi mangaba ajanga tang Kerala nung tzümetsüng lendong ya ataloker.
Madhav-i aniba committee-i sorkar dang Western Ghats nung kilometer 140,000 ji zone asem küma lemsatsüla aser tesem kar nungbo lisem ayaba/long atepba nokdangttsüla aser ayong nung kiojen talang yangluba nokdangtsü benoka liasü, ajisüaka Kerala sorkari Committee report ji magizük aser committee-i benokba onük ka danga meinyak.