Goa minister ka pai foundation azüngtsüba Jail nung puokogo

Panaji, August 14 (Agencies): Taoba mapang Goa nung Public Works Department (PWD) minister, Churchill Alemao ‘Louis Berger’ süpokrem ken o nung puogo, aser taoba mapang Jail yanglutsü atema pai foundation azüngtsüba jail nung pa puokogo.

Alemao anogo tenetnü Crime Branch Lock up nung ayuba sülen yashi pa tang tasen yangluba Colvale jail nung puokogo.

Jail tasenba nung Goa yimtenren lenir ka mezüng pouksangji pa lir. Iba Jail yanglutsü atema 2010 küm pai foundation lung azüngja liasü.

District court nungi aluba mapang pa pusemertem dang pai, “Colvale jail foundation lungji ni azüngja liasü. Iba jail nung nüngdakba facility aika lir,” ta ashi.

Yashi District Judge, B P Deshpande-i taoba minister judicial custody nung ayutsü tuyua liasü.

Taküm May 30 nü lapokba Colvale jail ya Goa yimtiba, Panaji nungi kilometer 40 pilar lir, aser iba jail ya sen crore 107 intoka yanglua liasü.

Aguada jail nung puoka alirtem Colvale jail-i belenogo, iba jail tasenba nung nisung 300 tashi puoka yutettsü.