Goa nung asemben tashi CM Parrikar süogo

Panaji, March 17 (Agencies): Goa nung Chief Minister teinyakdak aser taoba Union Defence Minister Manohar Parrikar taonung süogo.
Panaji nung par jabaso’er kidang lia pa tango sadem. Pa arishi küm 63 tain liasü.
February 2018 nungi tenzüka Parrikar temang nung cancer tashidak putetba sülen Goa, Mumbai, Delhi aser New York nung mozü ki balala nung anepalua aru.
Goa nung asemben tashi Chief Minister inyaksang Parrikar ya tashishitsü melii mapa inyakba aser ajemalua libaliroba atema nisungtemi akhümtsübur. Pa ya nisungtemi melamela tongtetba aser sensaksemtetba lennir ka liasü.
Parrikar-i mapang shia scooter nung menersa senzü.
BJP nungi takok ngua inyakba chief minister tem rongnung pa ka liasü, kechiyong pai Christian aika aliba state ka nung BJP party jenjang junga amentet.
2014 Lok Sabha elections jakdang 2013 küm Parrikar-i mezüng Narendra Modi ya BJP indang Prime Ministerial candidate asütsü junger ta shidanga liasü.
Pa ya 1978 küm IIT-Bombay nungi metallurgical engineering graduate ka liasü. Parrikar ya 1955 küm Mapusa nung aso. Iba mapang Goa ya Portuguese nunger yimsüsüba kübok liasü. Pa Loyola High School Margao nung azüng.
2000 küm pa kinungtsü Medha-a cancer agi shiranga asü. Tena nem jabaso ana moaja lir.
2014 küm pa PM Modi’er cabinet nung Defence Minister inyaktsü atema shim. Iba mapang pai Cabinet minister inyaktsü nungnanga liasü aser state toktsür mounüseti New Delhi-i ao.
Küm asem sülen pa tanaben Goa-i meyipa aru aser Chief Minister aküm. Assembly election agiba sülen Goa nung party tilatemi Parrikar nem Chief Minister inyakdaktsüra BJP posemtsü ta ashiba agi pai Cabinet Minister menden toktsür meyipa aru.
Ajisüaka, pa chief minister inyaktsü tenzüker küm ka shi dang lir temang nung tashidak tulu aliba putet aser New York nung aliba Sloan Kettering Cancer Research Foundation nung mezüng oa anepalu.
Goa Forward Party (GFP), Maharashtravadi Gomantak Party (MGP) aser Independent MLA 3-i teyari agüja Parrikar-i Goa state nung teloktep sorkar ketdangsüa aru.
Pa asüba ajanga Goa yimtenren mapa nung tipmatem ka adokogo, kechiyong Congress-i Goa Governor Mridula Sinha dang nübo tajemba sorkar anenjang aser parnok nem sorkar akümtsü temelaba agüjang ta shidi ka züluogo.
Tanü Chief Minister Manohar Parrikar temang tajungba küma aoer ta osang angashiba sülen BJP-i par MLA tem dang state toktsür maotsü atema tetuyuba ka agütsü.