Goa nung bendanger ana apu

Panaji, December 08 (Agencies): Goa nung ozüng alema ‘paragliding’ asüba puteta Russia nunger ka dena, bendanger ana pua lir aser ka police-i tebushidak lir, ta ketdangser kati Mongulbarnü metetdaktsüogo.
Russia nunger Pavel Isipchuk aser Belarus nunger Anton Antonov naprongla ‘paragliding’ maparen nung tanishirtem lir aser tena ya Arambol yimtak Russia nunger raliwali senzürtem teti amungba nüngtugu tzüküm nung police temi mita aoba mapang apu, ta police inspector Devendra Gad-i ashi.
“Tena ya temelaba shitak meli-i ‘paragliding’ inyakyim tezküka inyakerba liasü. Police-i mita aoba video tangoka aliba bendanger kabo mangu bushidar. Keri-Arambol nung ozüng alema inyakba mapa nung tang mangu bushia alisang ya-a densema alitsü südi ta police-i mulung melemi bilemer,” ta Gad-i Mongulbarnü IANS dang ashi.
Paragliding ya saisapong rongnung ka lir aser Goa nung aliba tzükümtem nung bendangertemi kanga sapua asayar. Ajisüaka iba tzüküm nung anogo pongu nü tashi paragliding asayasang, India Mujahideen züngsem, Syed Ashfaque, Bengaluru police-i taküm küm tetenzülen kiralongra mapa dak sentakba nung apuba sülen taküm September ita nungi sorkari iba saisapong parnok küboki ayu. Arambol yim ya Panaji nungi kilometre 40 pilar lir.
Bengaluru Police-i asüngdangyaba mapang Ashfaque-i, pa paragliding training November 2013 nung agi aser India nung anüng nungi kiralongra mapa kar inyaktsü indanga shisem.
Paragliding jangrartemi sorkar, tesem anasa aliba police, Panaji tourism director, tesem nung aliba sub-divisional magistrate, Civil Aviation nung Director General aser Dabolim nung aliba Air Traffic Controller tem dang temelaba agitsü asoshi North Goa district collector ajanga taküm September ita nung metetdaktsü.