Goa nung BJP-i assembly menden 29 atema candidates sangdong

New Delhi, January 12 (Agencies): Goa assembly election nung BJP chief minister candidate ji Laxmikant Parsekar masütsü ta shia tanü Brihostibarnü BJP-i assembly menden 29 atema candidates tenüng sangdongogo, aser parnok rongnung tang BJP MLA teinyakdak 17 densema lir.
Bodhbar nikongdang central election committee senden amenba sülen tanü Delhi nung party candidates sangdongba rongnung Paresekar dena lir.
Yaküm temelungjang tashidak agi shirangsang temendak MLA, Deputy Speaker Vishnu Surya Wagh bo temang maneni aliba ajanga metokteptsü saka pa melen Ramrao Surya Wagh tokteptsü.
State nung BJP atema tongti nüboyimerji Union Defence minister aser taoba mapang state chief minister, Manohar Parrikar asutsü.
State nung BJP, Congress, regional teloktep aser AAP party tem tongti ser tokteptsü.
Paresekar ya Parrikar den kanga atongsema inyaka liasü. Ato kilonser, Narendra Modi-i Parrikar Union cabinet nung defence minister shimba sülen Parsekar-i pa jenjang angu.
Candidates sangdongba sentong nung CEC secretary, J P Nadda-i, party-i lokti ajak nem maongka agütsüogo aser party-i menden 40 prongla nungi tokteptsü, ta metetdaktsü.
Yashi nungi nomination tenzüka liasü aser ibaji January 18 nü tembangtsü.
Chief minister candidate ji shiba asütsü ta asüngdangba langzüdang Nadda-i, iba telemtetbaji parliamentary board-i agitsü, ta ashi.