Goa nung Congress-i Angh dang sorkar akumtsü asüngdanger

Panaji (Goa), March 16 (Agencies): Goa nung Congress party-i ano maneni Goa Angh, Mridula Sinha dang state nung Chief Minister Manohar Parrikar-i aniba sorkar anentsütsüla aser sorkar akumtsü atema Congress jaoktsüla, ta mepishiogo.
Goa Congress unit-i state Angh dang, nüburtemi Parrikar-i aniba sorkar dak tamang akaba samaogo, anungji sorkar akumtsü atema single largest party, Congress jaoktsüla, ta ashi.
Congress-isa, menden 40 aliba assembly nung BJP tashi ano ajema akumtsüa akok, ta ashi, ajisüaka state nung Tir yimsüsübabo mebenoktsüla, ta parnokisa ashi.
Opposition lenir, Chandrakant Kavlekar-i sign asüba shidiji tanü Angh, Sinha nem agutsü. Congress-isa sorkar akumtsü atema Sinha dang senden ka amentsü asüngdangogo.
“Congress-i Goa nung sorkar akumtsü asüngdanger; Angh dang BJP-i aniba minority sorkar anentsür sorkar akumtsü atema single-largest party Congress jaoktsü shidi ajanga mepishiogo,” ta Congress-i metetdaktsü.
Shidi nungjisa, “Goa state Tir yimsüsüba küboki aitdaktsütsü merangra ibajibo ozüng alema inyaker asütsü aser ibaji anema onoki nokdaktsü,” ta shia lir.
“Onoki state sorkar akumtsü asüngdanger, iba denji külemi BJP-i aniba sorkar anentsür sorkar akumtsü atema onok jaoktsü akhanger,” ta Kavlekar-i metetdaktsü.
“Sorkar akumtsü atema single largest party jaoktsüla, aser state nung Tir yimsüsüba benoktsü merangra ibajibo democracy alema inyaker asutsü aser ozüng alema inyaker asutsü, anungji ibaji anema onoki nokdaktsü,” ta paisa ashi.
Mapusa BJP MLA, Francis D’Souza asüba sülen Congress-i state nung sorkar akumtsü asüngdangogo.