Goa nung Congress-i, aser Bihar nung RJD-i sorkar akumtsü akhanger

New Delhi, Monupii/May 17 (Agencies): Karnataka state Angh, Vajubhai Vala-i sorkar akumtsü atema state nung single-largest party, BJP jaokba sülen anogo ka lir tanü Opposition party ana- Congress aser RJD nati Bihar aser Goa Angh na dang, taoba assembly elections nung parnok single-largest party liasü, anungji Karnataka Angh-i inyakba ama sorkar akumtsü atema parnok jaokang, ta takhangba agütsüogo.
Tawa Karnataka assembly nung menden 222 atema election agiba nung BJP-i menden 104 nung takok ngua single largest party liasü aser Congress-JD(S) teloktep senteper menden 117 lir, anungji sorkar akumtsü atema state Angh, Vajubhai Vala-i Congress-JD(S) nem tama maongka agütsütsü ta imlaa liasü, ajisüaka Angh-i menden ishiba aliba, BJP ang jaoka tanü BS Yeddyurappa Chief Minister inyaktsü atema tenangzükba agiogo.
Iba nungji ajemdaker tang Goa aser Bihar na nunga single largest party Congress aser RJD nati Karnataka nung Angh-i inyakba ama parnok nema kasa maongka agütsütsüla, ta akhanger.
Tanü Congress-i sangdong ka ajanga, parnoki Goa Angh, Mridula Sinha ajurua la dang sorkar akumtsü atema parnok jaokang ta akhangtsü, ta metetdaktsü.
Ano külen Bihar nunga RJD lenir, Tejashwi Yadav-i Bihar Angh, Satya Pal Malik dang, tang aliba Bihar assembly anentsür sorkar tasen akumtsü atema par party RJD jaokang, ta takhangba agutsüogo.
2017 küm Goa assembly election nung Congress-i assembly menden 40 nungi menden 17 nung takok ngua single largest party liasü, ajisüaka sorkar akumtsü atema Angh-i parnok mejaok.
Ano 2015 küm Bihar nunga menden 243 nungi RJD-i menden 80 tashi nung takok ngua single-largest liasü saka opposition teloktepi sorkar akum.
Karnataka nung sorkar akumtsü atema Angh-i BJP jaokba sülen RJD lenir, Tejashwi Yadav-i Bihar Angh, Satya Pal Malik dang Bihar assembly anenjang aser sorkar tasen akumtsü atema single-largest party, RJD jaokang ta takhangba agutsü.
Osangbenertem senden nung jembidang Tejashwi Yadav-i, “Karnataka nung democracy tepsetba anema onoki asüng longkak aittsü. Onokisa Bihar Angh dang state sorkar anentsür Karnataka nung inyakba ama single largest party jaokang ta mepishiogo,” ta metetdaktsü.
Yadav-isa, asüng nikongdang 1:00 ako nung pai Bihar Angh ajurutsü, ta metetdaktsü.
“BJP-i majority koma sayutettsü? Amit Shah-i atema teinyaktsü tasa ka dang lir- sen agi alizüktsü mesüra tanga party tem mesüzüktsü atema CBI aser ED ama agency tem yoktsü. Iba ya BJP kijai tashi alia amshiba lir,” ta pai metetdaktsü.
“Asenoki iba ya anema menokdakra Karnataka aser Bihar na nung inyakba ama BJP-i maneni taruba Madhya Pradesh aser Rajasthan elections nunga kasaji inyaktsü,” ta paisa shisem.
“Yashi Bihar nung atalokogo, tanü Karnataka nung ataloker, anungji tanü asenok longjema melira asüng Madhya Pradesh mesüra Rajasthan nunga kasaji ataloktsü,” ta paisa shisem.
Goa nunga Congress Legislature Party lenir, Chandrakant Kavlekar-i, asüng party-i Angh, Mridula Sinha nem party MLA 16 pronglai sign süa aliba shidi ka agüja Karnataka Angh-i inyakba ama inyakang ta takhangba agütsütsü, ta metetdaktsü.
“Ozü MLA 16 lir aser ibaji ajanga Assembly (Goa) nung single largest party ji onok lir. Karnataka Angh-i inyakba ama Angh-i Goa nung sorkar akumtsü atema onok jaoktsüla,” ta Goa Assembly nung Opposition Lenir, Kavlekar-isa metetdaktsü.