Goa nung Congress MLA 10 BJP nung aden

New Delhi/Panaji, July 10 (Agencies): Karnataka nung Congress-i sorkar kümzüktsü atema merangba mapang ka nung Goa nung ano parnoki tebilemtsü tulu ka ajuruogo.
Goa nung Congress MLA 15 nungi 10-i tanü party toktsür BJP nung denogo.
“Opposition Leader-i anir Congress MLA 10-i BJP nung denogo. Tang BJP indang MLA 27 kümogo. Parnoki state aser parnok constituency renloktsü atema onok den aden. Parnoki teinyaktsü kecha magütsü aser onük kecha melii dang BJP nung denogo” ta Goa chief minister Pramod Sawant-i osangbener dang ashi.
Goa nung Congress toktsür BJP nung adenertemji Babu Kavalekar, Babush Monserratte, his wife Jennifer Monserrate, Tony Fernandes, Francis Silveira, Filipe Neri Rodrigues, Clafasio, Wilfred De Sa, Nilkant Halankar aser Isidore Fernandes nungertem lir.
Tanü parnoki Speaker den ajurutepdang Chief Minister Pramod Sawant dena liasü.
Taoba ita Congress-i Telangana nunga kasa timtem ka ajurua liasü. Idangji MLA 18 nungi 12-i Chief Minister K Chandrashekar Rao’er party nung aden.
Maneni, Karnataka nung MLA 18-i assembly nungi anenba ajanga Congress-Janata Dal Secular (JDS) teloktep sorkar loksatsüsa tia ka ajurua aliba mapang ka nung Goa nung iba khuret ajuruogo.
Karnataka Congress nung yimjung yanglur DK Shivakumar-i tanü Mumbai-i oa lungkak aitba MLA tem den ajuruteptsü merang saka police-i pa Renaissance hotel telungi meidaktsüi noktang.
Shivakumar-i hotel kima ghonda aika ata aser idangji Mumbai Congress lennirtem Milind Deora aser Sanjay Nirupam naprong pa den liasü.