Goa nung Congress & non-BJP lenirtem sensaksemdar: Chidambaram

Panaji, Metsüremi/March 8 (Agencies): Congress lenir tejen P Chidambaram-i Mongolbarnü ashiba agi, Goa nung Assembly elections vote mazüng tsüngda par party aser tanga opposition lenirtem sensaksemdar.

Goa nung constituency 40 atema vote tem March 10 nü 8 ako nungi azüng tenzüktsü. State nung election ya February 14 nü agiatokogo.

“Goa nungertemi onok nem simple majority agütsür alitsü ta onoki temulung lema bilemer. Ni taoba hopta dang nungi tang temulung talemba, kechiyong ni candidate ajak den sensaksemogo,” ta Chidambaram-i interview ka nung ashi.

“Onoki tanga party tem den inyaktsü mulunga lir,” ta pai ashi. “Onok nükjidongji non-BJP front ka kümtettsü atema lir aser iba amala mesükba inyakyim ya India kübok tanga tesem nunga benoka inyakdar. Anungji Goa nunga kodaser kasa inyakyim ya benoka minyaktettsü,” ta pai ashi.

Goa nung vote mazüng tsüngda Congress lenirtem AAP aser TMC lenirtem den tesendaktep yanglushitsü merangdar ta osang praongshiba mapang ka nung Congress leniri iba olen lemsatepogo.

Goa nung taruba sorkar kümtettsü atema pai tanga party tem den tongtepratepdar asü masü ta asüngdangba mapang Chidambaram-i, “ni indang indangabo sensaksem masü saka Goa nung onok lenirtemi Goa nung tanga party lenirtem den sensaksemdar,” ta ashi.

“Parnok ajak medemer dang. Parnok karbo sendaktepa lir. Parnok ajaki kati ka kanga junga meteta lir. Goa ya tila ka dang. Parnok sentong aika nung ajuruteper. Ozü party nungi lenirtem aser tanga party lenirtem joko anogo ishika sensaksema arudar ta kü dang shiogo,” ta pai ashi. Chidambaram ya Goa election atema Congress in-charge lir.

Chidambaram-isa, Congress party candidate temi party metoktsütsü ta ashi. “Takok ngua tongu candidate ajaki Congress party metoktsütsü ta temulung lema bilemer,” ta pai ashi.