Goa nung June 14 nungi 17 tashi ‘Hindu Adhiveshan’ alitsü

Mangaluru, June 11 (Agencies): Hindu Janajagruti Samiti-i Goa nung 6 buba Akhil Bharatiya Hindu Adhiveshan ayongzük amungtsü, ta state co-ordinator Guruprasad-i ashi.
Iba sentong ya June 14 nungi 17 tashi alitsü aser linük 20 dak tema nungi Hinduism sülen anidakertem adenshitsü. Sentong nung Hindu nunger teimba sür aliba linük nung ‘Hindu Rashtra’ tentettsü indang tebilembatem lemsateptsü, ta Guruprasad-isa metetdaktsü.
Hindu nunger dak sendakba onüktem benoka olemtepba dang külemi Linük Temzüng arrla Article 370 agientsü atema takhangba agütsütsü. Iba arrla agienba ajanga Jammu & Kashmir nung Hindu nungertem yaritettsü, ta paisa shisem.
Jammu & Kashmir nung sepaitem dak lung agi ona lungkak aitertem azüoktsü atema Army nem tashi agüjang ta Hindu Janajagruti Samiti-i takhangba agüja, Mangaluru, Udupi, Bengaluru, Hubli, Shivmogga aser Vijayapura tesemtem nung lungkak aitba sentongtem ayongzüka agiogo.
Guruprasad-isa ashiba agi, sepaitem dak lung agi aoner anema sorkari mapa inyaktsüla aser ozüng tesashi agi merenshitsüla.
Nashi tepsetbaji Hindu nunger anema inyakba mapa ka lir anungji iba inyakyim nokdangtsüla, ta paisa shisem.
Goa nung ayongzüka amungba sentong nung India aser bendanglen nungi teshimtet nübo 400 den tema arua adentsü, ta Hindu Janajagruti Samiti sangdong nungsa metetdaktsü.