Goa nung Kingfisher Villa talir mali

Panaji, October 19 (Agencies) : October 19 nü Rs 85.29 crore (reserve price) nung Kingfisher Villa auction asüba sentongji ghonda ka agi saka talizüker shinga maliasü.
Goa kübok Candolim nung Mallya’er senti kiojen alizükertem mongutetbaji State Bank of India (SBI)-i aniba bank 17 telok atema tetsükdaktsü ka lir.
Item bank nem Mallya’er Kingfisher Airlines-i sen crore 6,963 sentsüh agütsütsü lir aser 2014 nungi sen tetemlok bendena aruba sülen Kingfisher Airlines indang sentsühji sen crore 9000 shi jungogo.
Kingfisher Villa ji acre 3 shi aser football asayaba moapu asem shi tasazük lir. Iba villa nung Mallya-i sentong tulu aika ayongogo aser tesüsabubaji yaküm December nung pa indang tasoba anogo amungba lir. Iba sentong nung nüngtugu kentener Enrique Iglesias-ia shilem agi.
Iba kimung ya Nerul ayong aser Arabian tsüyim tsüngda lir aser hotel telok aikati tenük yoka liasü ta osang angazüker.
SBI-i ashiba agi, ki alizüknürtem nisung kari hopta ishika tejaklen ki aser kimung reprangdangogo saka tanü auction nungbo nisung shinga maru.
“Kingfisher Villa nung talila yangluloka aotsü lenmang sadema maliba ajanga hotel temi tanü auction nung maden. Iba kiojen ya kijatem alitsü atema kanga tajung saka reserve price (Rs 85 crore) kanga aika asüba ajanga parnok temulung moluotet südi” ta Knight Frank nung National Director, Saurabh Mehrotra-ia ashi.
Kingfisher Villa nung yangluloka aitsü atema tetsükdaktsü lir kechiyong iba kimung ya Coastal Regulation Zone (CRZ) kübok lir.
August 4, 2016 nü bank temi Mumbai kübok Ville Parle nung aliba Kingfisher House yokdoktsü atema sentong ayongzük saka iba nunga talir shinga maliasü. Iba ki auction atema reserve price ji Rs 135 crore liasü.
Bank temisa Mumbai Airport nung aliba Kingfisher Airlines indang osettem yokdoktsü merang saka osettemjia talir mali. Osettem rongnung trolleys, tractors, ladders aser office stationery tem dena lir.