Goa nung National Games alitsü anogo atsülanger

Panaji, June 07 (Agencies): Goa nung National Games alitsü asoshi kiojen taruba küm ang asütsü akoktsü, anungji state nung National Games alitsü anogo atsülangtsü, ta Goa Chief Minister, Manohar Parrikar-i ashi.
Iba asayamong ya 2016 küm September nung amongtsü liasü saka taoba state sorkar, Laxmikant Parsekar lenisüba mapang iba asayamong ya 2017 küm November ita-i thinena liasü.
“Nüngdakba kiojen tem tajemba jenjang nung yanglur Goa-i National Games taruba küm ayongzüka amongtsü renema lir,” ta Parrikar-i tanü osangbener dang ashi.
“National Games atema kiojen yanglutsü asoshi sen crore 570 nüngdaktsü ta sentong yanglua liasü aser iba sen crore 400 dang kümtsüogo. Iba sen ya crore 350 tashi alutsü ni imlar,” ta pai ashi.
State nung tesem ajunga nung saisapongtsü asoshi kiojen yanglua ayubaji junger saka item kiojen tem anepalua wazüka ayutsü nüngdaker, ta Parrikar-i shisem.
“Saisapongdang amshiba osettem ya tesem tezülen oa yutsüra, shibai item oset aser kiojen anepalutsü. Anungji item ajak shisadanger ang saisapongtsü atema kiojen yanglutsüla,” ta Goa Chief Minister-i ashi.