Goa Police-i ‘Blue Whale Challenge’ asaya anema temetettsü sangdong

Panaji, Goa, August 18 (Agencies): Kerala aser Maharashtra na nung lanur ana ‘Blue Whale challenge’ asayadang soseta asüba osang angashiba sülen lanurtem iba online game asaya masayadaktsütsü asoshi tsürabur ajaki kanga junga pei tanurtem mita alitsü atema temetettsü ka Goa police-i sangdongogo.
Iba temetettsü ya Crime Branch-i Brihostibar aonung menur ka sangdonga liasü. Parnoki ashiba agi, mobile phone aser computer ajak tsüraburtemi azüoka yutettsü mechi nung software ka inoka ayutsüla aser item oset amshitsü asoshi mapang atakteta yutsütsüla. Iba game asayar tanurtem shisatsü nung timtemtsüsa tensa ajurutsü akok mesüra pei sasa soseta asütsü tebilemba arutsü akok, ta tan metetdaktsüba sangdong nung Superintendent of Police (Crime Branch) Karthik Kashyap-i ashi.
“Nür tanur yimya nung aser libaliro nung parnok shisatsü animesüngzüktetba mesüra tekolok nung timtem aliba metettsü merangang. Parnoki inyakbatem teti reprangshiranga alitsüla aser iba dak sendakba nung nüngdakba ajak tsüngsü pua anidaktsü junger,” ta paisa shia lir.
Karthik Kashyap-i, “Nai nür tanurtem dak item amala yimyayimpong putetba ajanga nür chir shisatsü tali tajungba nung angatettsü. Nür tanuri yokba text message, call asüba, net amshiba, Facebook janga tangar den jembiba, Snapchat, whatsApp etc nunger amshiba teti reprangdanga metettsü merangang,” ta ashi.
“Iba den külemi mobile aser computer tem nung app tem kanga ajema ayutsü merangang,” ta kasa sangdong nung shia lir.
Blue Whale challenge game ya Russia nunger, Philipp Budeikin-i yangluba lir, aser iba asaya yagi lanurtem pei sasa yirutsü ajungshir aser shilem 50 shi soseta asüba nung tembanger, ta sangdong nungsa shia lir.
Tang tashi nung iba asaya ajanga alima rangben nung lanur 100 ka dak tema süogo.
Tsüraburtemi iba asaya dak sendakba nung tanurtem den sensak asemtsüla, ta temetettsü nungji shia lir.
“Nür tanur den iba asaya dak sentakba nung sensaksemang. Iba asaya indang kaketrejutem nung angshi asü, ta nenoki tanurtem dang asüngdangang aser parnoki hao ta shira takaratiba nung tesayurtem den tongtepratepa nokdangtsü merangang,” ta sangdong nung shia lir.