Goa ya ‘Shirangba State’ ta sangdongtsüla: Shiv Sena

Panaji (Goa), Mongputeni/October 05 (Agencies): Shiv Sena lenir, Sanjay Raut-i, Goa ya “shi aser shisatsü naprongla nung shirangba state” ta sangdongtsüla, kechiyong state nung Chief Minister-i anir minister aika shiranger aser sorkar telung nung rara adoka mepetmesü lir, ta ashi.
Goa yimtiba, Panaji nung osangbenertem den jembidang Raut-i, “Bihar ama linük nung state aikati senotsü jenjang majungba agi shirangba state ta sangdongdaktsüner, kechiyong parnoki (Centre nungi) teyari angutsü,” ta ashi.
“Ajisüaka Goa yabo balaka. Iba state ya shisatsü aser shi naprongla nung shirangba state ta sangdongtsüla, kechiyong minister tem aika shiranger aser Manohar Parrikar-i aniba teloktep sorkar nung mepetmesü jenti adoka lir,” ta paisa ashi.
Manohar Parrikar ya temang mejungi Delhi-i anir oa hospital nung mongdar.
Parrikar temang mejungi dang aliba ajanga mapang timbaka state nung malir aser ibaji ajanga tesüiba ita ishika sorkar anokshir, ta Raut-i ashi.
“Iba dak alia minister tema kar shiranger. Ibayongji parnok kar anentsünung parnoki, parnok küm aika party nung lia aruogo ta shia nemnemer,” ta Raut-isa ashi.
Lok Sabha election matongdang Goa Assembly anentsü ta Sena-i bilemer, ta Sanjay Raut-isa ashi.