Goalpara nung ‘tribunal’ züngsem ka merenshiba asoshi police-i chargesheet agütsü

Guwahati, March 26 (Agencies): Goalpara nüng Additional Foreigner Tribunal, Ajoy Phukan dak February 15 nung züka merenshiba ken o nung ajemdaker Goalpara Police-i nisung 8 tenüng nung ‘chargesheet’ agütsü. Iba ‘chargesheet’ ya Goalapara indang Chief Judicial Magistrate court nung Honibarnü agütsü.
Iba ‘chargesheet’ ya Shahjahan Ali, Nazrul Islam, Omar Faruq Choudhury, Anisul Haque, Anwar Hussain, Abdul Hamid, Mir Abdul Baten aser Mainal Haque nungertem tenüng nung agütsü.
“Parnok ajak ya lawyer lir,” ta SP ajanga ashi.
“Nisung 10 apu aser parnok rongnung nisung 8 iba ken o nung densema lir,” ta Goalpara SP, Amitava Sinha-i ashi.
“Rarabangsen adokdaktsüba, nisung tepsettsü asalentong yangluba, sorkar mapa inyaker pa mapa inyaka aliba nungi nokdangtsü merangba, tangar yirutsüba aser temelaba magii tangar ki telungi aitba asoshi parnok apu. Item kisüng masü saka nüburtem indang kiojen raksatsüba asoshi parnok aitsü,” ta SP-isa ashi.
Bagnawara tesem nung aliba nisung 8 ainer, ta tribunal ajanga February 9 nung sangdongba sülen Phukan dak teka aiba nung parnok densema aliba ya bushisüngdanger temi bushitet. Iba obendang agütsüba nung mepelai, Nazrul aser tanüngba nisungtemi Phukan indang court chamber-i ao aser Phukan den tashii asateper maneni pa dak azük.
Iba lendong atalokba sülen state tesem ajunga nung longkak ait tenzük.
All Assam Students’ Union (AASU), Gauhati High Court Bar Association, Prabajan Virodhi Manch aser lokti balala den state nung tashi temetetertemi iba mapa aitsü aser aibelener pua tapet temerenshi agütsütsü akhang.
Iba lendong atalokba sülen state nung aliba tribunal tem lendong balala nungi taküm kümzüka ayutsü atema reprangshitsü ozüng ka DGP Mukesh Sahay-i agütsü. Foreigners’ tribunal ya D-voter mesüra ‘doubtful citizenship’ dak sentakba ken o reprangtsü asoshi tenzük. Assam nung D-voters ya 1,43,227 shi lir.