Goan Burah temi Modi dang Naga yimten latettsü akhanger

December 12, 2018 nü Kohima nung Nagaland Goan Burah Federation (NGBF) aser Kohima District GB Association-i anir mulungtet teloktemi Naga yimten latettsü atema takhangba agüja sentong agiba angur. 

Kohima, Luchii (December) 12 (TYO): India sorkar aser Naga nationalist political groups (NNPGs) tsüngda yimten olemtep tatembang kati maruba agi Naga civil society temi nungita Goan Burah noklang aikati tanü yimdong nung Naga yimten latettsüla ta takhangba agüja senzü.
Nagaland Goan Burah Federation (NGBF)-i state ajungalen iba yimjung rally agitsü ayongzük.
State yimtiba Kohima nung GBs noklang aika Indoor Stadium Kohima nung adenshi aser India sorkar dang Naga yimten tekaratiba nung latettsü atema takhangba agütsü.
Rally agiba sülen parnoki Raj Bhavan tashi tetsüng agi jaja aser State Governor PB Acharya ajanga Prime Minister, Narendra Damodardas Modi dangi shidi ka bendaktsü.
“Naga nungeri ajaki agizüktetba telemtetba ka agidaktsünür. Naga political groups aika adenba Working Committee (WC) aser NSCN (IM) den yimten olemtep ajanga iba telemtetba agidaktsünür, ta GB Federation-i memorandum nung shia lir.
“Naga nungeri Modi’er sorkar dang nungi tulu ka imlar aser ibaji Naga nunger kipok shia jembidar. Nai television ajanga alima dang India sorkar aser Naga nunger tsüngda rara anenogo ta jembiba onoki bilemteter” ta parnokisa PM Modi dang ashi.
Union Home Minister Rajnath Singh-ia aiben Indo-Naga yimten tebilemtsü joko angatetteptsü mapang tonga arur ta jembiogo, ta parnokisa shisem.
Indo-Naga yimten tebilemtsü atema , Deputy National Security Advisor, R.N. Ravi interlocutor inyaktsü shimbaji shisa taka mapa ka lir. August 3, 2015 nü NSCN-IM den Framework Agreement agiba sülen November 17, 2017 nü Naga political groups 6 den Interlocutor RN Ravi-i “Agreed Position” mesüra “Preamble” ka nung sign asüba ajanga Naga nungertemi yimten tekaratiba nung latettsü ta teimla tuluba aküm, ta NGBF-isa ashi.
“Joko Luchii/Dec. 2018 tongogo aser benjung mapang lir. Onoki Khristmas aser New Year yongya atadang, na aser nü den külemi inyakertemi Naga nunger tsüngdang nangzükba ama mapa inyaktsü mebilemer asü?” ta parnokisa Modi dang asüngdang.
India aser Naga putiotsü atema tongtipang mapang ka nung PM Modi lir. Tang yimten olemtep liyonga arudang tejembitsü onük ajak jembiogo aser telok anapronglai yimjung nung liyonga aitsü mulungtepogo. Anungji nai (Modi) anir tatembang telemtetba ka agitsüla, ta NGBF-isa shia lir.
“Taoba mapang Naga nungertemi India sorkar den tamajung aika ajangshiogo. Tanü yimten olemtep anendaka lir ama ajiteter aser iba atema tebilemtsü abener. Anungji nai (Prime Minister Modi) Naga nungeri agizüktettsüsa Naga yimten latettsü atema yaritepang,” ta NGBF president Shaleem Konyak, general secretary Shikuto Zalipu aser Kohima District GB Association president Vineipra Pienyü nungertem sign asüba memorandum nung shia lir.