GOC-in-C Eastern Command-i tenüngsang agütsü

Kohima, Monupii/May 20, 2019 (TYO): India kübok Army Public School balala nung kaket shisatsü angazükdaktsütsü nükjidong nung sepia indang tanurtem züngdaktsür. Item school ya AWES kübok school ki aser nüngdakba ajak peria yur nija school ama achayanga arudar.
Indian Army Eastern Command kübok West Bengal nung Army Public School 22 tashi amenoka lir aser tanga North Eastern state balala nung joko school 25 dak tema achaayanga odar.
Army Public School nung staff aser achaayangertemi kanga dang bendanga agüja inyakba ajanga kaket reju tem nüngtugu kümogo. Taküm küm-a CBSE tatidang nung Class X aser Class XII kaketshirtemi takok tajung bener arutsüogo aser aji tesayurtemi nendaka sayuba kuli tejangja angur.
Kaketshir shilem 100% agi iba board tatidang nung jenjang tajung nung takok nguogo. Item kaketshir rongnung Class X nungi kaketshir shilem 27 aser Class XII nungi kaketshir shilem 17-i marks shilem 90 dak tema anguba osang CBSE ajanga sangdongogo.
Army Public School, Tezpur nungi Master Tushar Tayal-i marks 99% ngua Assam state nung temaba jenjangi ayi. Kasa mapang Army Public School Shillong nungi Class XII tatidang nung Master Swapnil Mishra-i marks 98% ngua Meghalaya state nungi temaba jenajang tonga liasü. APS Bengdubi nungi Class X tatidang nung Master Rohan Tripathi-i marks 98.80% ngua liasü.
Kolkata kübok school kar nungi tangar dang alakteta takok tajung angur kaketshir aser Principals nunger nem Lt Gen MM Naravane, PVSM, AVSM, SM, VSM, GOC-in-C Eastern Command aser Veena Naravane, Regional President AWWA nati parnok maparen ngua tenüngsang agütsüba sentong ka agia liasü.
School ajak nung takok tajung angur kaketshir nem Kindle (e-book reader) sempettsü aser tanga kaketshirtem nema sempet balala agüja liasü.
“Army Commander-i tenüngsang agütsüba ya atangji nunga kaketshir aser staffs ajak asoshi konang lir. Iba tenüngsang agütsüba onok mulung nung teti alitsü aser tarutsü nung kaketshirtem atema tajungba ka ama asütsü,” ta sentong nung APS Kolkata Principal, Suchitra Bandyopadhyay-i metetdaktsü.