Gogoi-i Bihar nunger nem tenüngsang agütsür

Guwahati, November 8 (Agencies) : Bihar assembly election nung JDU-RJD-Congress teloktepi takok tulu anguba atema Deobarnü Assam chief minister Tarun Gogoi-i Bihar nunger nem tenüngsang agütsüogo.
Linük nung obang meputep aser tesempatep tali adokba mapang ka nung Bihar nungertemi JDU-RJD-Congress teloktep nem takok tulu ngudaktsüogo. Iba ya tamangbaren nung ajemdaker meinyakertem aser terenlok atema inyakertem asoshi takok tulu lir, ta Gogoi-i ashi.
Iba takok ajanga RSS-i anir telemsa adokdaktsütsü Hindutva tali bilemlokba teloktemi akhi India nunger lokti nung kin aser tamangba yimsü temeyoktep külemi liyonga aruba mesamatettsü ta kuli agütsür. Tanü asen linük nung telemsa adokdaktsütsü merangba mapang ka nung Bihar election ajanga India nunger temeyoktep lokti tali tashi itshiogo, ta Gogoi-isa metetdaktsü.
JDU-RJD-Congress teloktepi takok anguba ajanga Prime Minister Narendra Modi-i election nung tenüng atema terenlok indang onük jembiba jungkai adoka sayur, ta paisa shisem.
“Modi-i aniba sorkari Bihar nunger dang anogo tajung bener arutsütsü ta tiyazü nangzükba metetadok. BJP aser parnok den yaritepertemi tasa atonga nübortem mesüzüktsü merang saka Bihar nungeri iba tasaji ajitet” ta Assam chief minister-isa ashi.
Paisa Nitish Kumar, Lalu Prasad Yadav, Sonia Gandhi aser Rahul Gandhi nungertem tenüngsang agütsüogo.
“Parnoki anir, Prime Minister, Narendra Modi, Amit Shah, Sushil Modi aser RSS tanishir Mohan Bhagwat-i aniba Hindutva telok anema nüboyimba sentong agi aser takok tulu angu. Bihar nungertemi Nitish Kumar maneni nungittsü ta ni imlar” ta Assam CM-isa metetdaktsü.