Gogoi-i Myanmar nung ULFA(I) camp samatsütsü mepishi

Guwahati, December 02 (Agencies): Assam, Dibrugarh district kübok Namrup nung (ULFA(I) telungpurtem ta temulung melemi bilemertemi Hindi oshi jembir ana yirutsüba sülen Mongolbar nü Assam chief minister, Tarun Gogoi-i Union sorkar dang Myanmar nung ULFA (Independent) aser NSCN-K teseptem samatsütsü takhangba agütsüogo.
Guwahati nung sorkar osang ka ajanga ashiba agi, Mongolbar nü Chief minister, Tarun Gogoi-i Indian Army, GOC 3 Corps dang phone ajanga Assam anüdoklen tesemtem nung telungpurtem anema operation tesashiba aotsü mepishiogo.
Gogoi-isa state Chief Secretary, V K Pipersania aser DGP, Mukesh Sahay na dang state nung nübur telemsa ajak kümzüka alitsü asoshi inyakang, ta shiogo.
Hombar aonung Assam, Namrup nung lung atudak tesem ka nung melung melemtetba ULFA (I) telungpurtemi injang yokba mapang nisung ana yiruja liasü.
Police-i ashiba agi, Dibrugarh-Sivasagar district arrtsülen aliba lung atudak tesemi lanurtem motorcycle nung arur injang yok.
Injang agi yirur anaji Sanjay Bharati aser Gopal Shah na ta jangjaogo. Tenaji Dibrugarh nung aliba Assam Medical College & Hospital-i anir ao.
Iba tatalokba atema telungpur teloki tenüng magiaka Nagaland aser Arunachal Pradesh na arrtsü nungi talangka mepilai aliba tesem nung kanga yakyaka aliba ULFA (I) dak melung malemer.
DGP, Sahay-i ashiba agi, State nung telungpur rara ajema kümaka, mapang mashi ka nung lendong tulu adoktsü akok, anungji state police force aser security forces na temelung sür zübazülema malitsüla.