Gogoi-i PM dang Brahmaputra ken o China den angatetteptsü mepishi

Guwahati, Metsüremi 28 (Agencies): China nungeri Brahmaputra ayong nung tzünokdang yangluba dak sendakba nung tebilemtsü kaa, taoba Assam Chief Minister Tarun Gogoi-i Rasemnü Ato Kilonser Narendra Modi dang iba ken o asadangtsü asoshi shiogo.
Osang benertem den sensaksemdang taoba CM tarun Gogoi ashiba agi, China nunger ‘artificial rainwater harvesting plan’ ajanga North-eastern tesem atema lendong tali bener arutsütsü.
“China nungeri Tzünokdang ka yanglua Brahmaputra ayong mesür odar aser iba ajanga asenok tzü agi anüngtsü. China nunger ‘artificial rainwater harvesting plan’ ajanga lendong tali bendenloktsü. Ato Kilonseri iba ken o ya kanga junga asadangtsü nüngdaker,” ta Gogoi-i ashi.
India Ministry of Water Resources aser China nunger tsüngda tang trans-border ayong dak sendakba nung angatettepa inyaktsü asoshi jembishinüba mapang ka nung Gogoi-i iba tebilemtsü ya lemsatepogo.
Linük anaprongla nungi ketdangsertem China kübok Hangzhou yimti nung ajurutepogo.
Ketdangsertemi Brahmaputra aser Sutlej ayong indang hydrological indang data utilisation osang China nungeri agütsüba asadangogo.
India aser China na pronglai ‘flood season data’ lemsateptsü asoshi mulungtepogo, koba taoba küm China nungeri magütsüi liasü.
Luchii (December) nung Assam nung Brahmaputra ayong aser Arunachal Pradesh nung Siang ayong nung lishitzü yima liasü aser iba ajanga state ana nung aliba nüburtem aser ketdangsertem shisabulua liasü.
State anaprongla nung sorkari tzü menenba ya China nung tzünokdang yangluba ajanga asütsü ta temulung melemi liasü.
Yarlung Tsangpo ayong koba Tibetan plateau nungi ayimtenzüker iba ya India kübok Arunachal Pradesh nung Siang ayong ama aser Assam nung Brahmaputra ayong ama ayimer.