GoI aser NSCN IM tsüngda tangatettep kati marur

Kohima, October 29 (Agencies): India sorkar aser NSCN IM tsüngda senden punguben tashi menaka tangatettep kati marutet tembangogo.
Tanü-a New Delhi nung senden ka amen saka kasa tia nung dang tembang.
“Tanü senden nung tangatettep kati marutet. Asüng-a IM aser GoI senden amentsü” ta Mongulbarnü osang ka ajanga ashi.
Yashi India sorkar aser NSCN-IM tsüngda senden pezübuba mena liasü saka Naga wako aser temzüng indang onüktem atema tangatettep kati marui tembang ta osang ajanga ashi.
Ano, tanü India sorkar aser Naga National Political Groups (NNPGs) tsüngda senden ka amen aser idangji NNPGs indang onük ajak angatettepogo aser NNPGs-i mashii mapang ka nung tenangzüktep nung sign asütsü renema aliba shiogo, ta osang ajanga shisem.
Mongulbarnü India sorkar aser NNPGs tsüngda senden amenbaji taoba mapang mulungtepa aliba onüktem meyipa reprangshiba mapang ka dang liasü. Senden nung Nagaland Governor aser Interlocutor, RN. Ravi-i October 31 tashi nung olemtep tembangtsü aliba nenshia metetdaktsü.
NNPGs pur October 31 tashi Delhi nung amongtsü aser iba mapang parnoki India sorkari den maneni olemteptsü.
Konyak region nung NSCN IM züngsemtem NSCN U nung aden
NSCN-IM lennirtem New Delhi nung oa Framework Agreement atema tekong merangtepba angatetteptsü atema amongdang, Konyak region nungi züngsem kar NSCN-U nung denogo ta osang angazüker.
October 28 nü NSCN-IM züngsem 22 shi kati NSCN U nung aden. Ano, tarutsü anogotem parnok aika NSCN U nung adentsü akok, ta osang ajanga ashi.
October 25 nü taoba NSCN IM Kilonser Hukavi Yepthomi-i Naga National Political Groups (NNPG) indang Working Committee nung adentsü telemtetba agia liasü.
Naga tensa chichiba angateta aser nübortemi aginüba ama NSCN IM toktsütsü lemtet, ta Hukavi Yepthomi-i ashi.
Centre sorkar nungi osang kecha meliaka, Nagaland nung alirtem yimjung olemtep koma aser kodang tembangtsü ta asüba terata ka nung lir.
NSCN-IM-i ceasefire agreement agien nungbo ta bilema Nagaland nung Indian Army sepaitemi mapa tanaben lemzüktsüogo ta osang ajanga ashi.
October 20 nü state sorkari Nagaland Police aser para-military force dang tensa mejungi aküm nungbo ta bilema ita ana atema rations & supplies rizünga ayutsü tetuyuba agütsüogo.