GoI aser NSCN(IM) dang Framework Agreement tejakleni bener aotsü mepir

Kohima, June 15 (TYO) : Nagaland Legislators’ Forum on Naga Political Issue-i Bodbarnü India sorkar aser NSCN(IM) lennirtem dang August 3, 2015 Framework Agreement agiba tejakleni bener aotsü aser tekaratiba nung Naga nunger ajaki agizüktettsüsa telemtetba ka agitsü atema ayongzükogo.
June 15, 2016 nü Nagaland Legislative Assembly Conference Hall nung Assembly Speaker, Chotisuh Sazo lenisüba kübok senden ka amendang iba temepishiba ya agütsü.
Yaküm August 3 nü Centre aser NSCN(IM) tsüngda Framework Agreement agiba pusema nungiter ta bangzünga renemba sülen Parliament züngsem ana dena Legislative Assembly nung Naga nunger yimsüsürtemi Speaker aser Chief Minister na lenisüba kübok Parliamentary Working Committee-i Delhi nung oa Central lennirtem dang tekaratiba nung telemtetba ka agitsü atema nenshitsü mapa lemzükja liasü.
Tanü senden nungsa Nagaland Legislators’ Forum on Naga Political Issue-i Forum for Naga Reconciliation (FNR) aser state sorkar nung Political Affairs Committee (PAC)-telok balala tsüngda mangatettep aliba bentettsü aser kanga dang tongtipang mapang ka nung Naga yimtem tebilemtsü koktettsü atema mapa inyaktsü mepishia metetdaktsü, ta Commissioner & Secretary of State Assembly, N Benjamin Newmai- sangdong ka nung metetdaktsü.