GoI-i Naga yimtenren bentetba nung tali rangloktsüla: NSCN/GPRN

Dimapur, Chiteni/July 06 (TYO): Osang kaket nung “Absconder under PMLA case” ta sür osang ka adokba dak sendakba nung NSCN/GPRN ajanga sangdong ka agüja liasü.

Iba ken o ya 2017 küm atalokba dak sendakba lir, kong 34 Assam Rifles temi Karong, Manipur anasa Mobile Vehicle checkpoint ka amenoka aliba nung Taga, Myanmar nung kibong kumer küm 25 ajungba nung amshitsü sen apu, ta NSCN/GPRN indang Ministry of Information and Publicity (MIP) ajanga ashi.

Indian security forces temi iba sen Manipur Police nem agütsü aser iba sülen Chief Judicial Magistrate, Senapati indang court nung ken o ka benok aser sen aruba lenmangtem dak sendakba nüngdakba documents ajunga court nem agütsü aser court ajanga inyakyim shidak amshia May 9, 2017 nü Cril. Misc (Zima) case no 10 of 2017 Ref. FIR NO. 8(4) SPT P.S. U/S 17UA(P) Act nung obendang agüja tai tonglokja alir medentsü aser apuba sen meyipa agütsü, ta sangdong ajanga ashi.

Gen. Niki Sumi ya kodanga sen bener mapu, anungji Government of India dang Gen. Niki Sumi ya ‘money laundering’ ken o koba nung shilem agia lir ta asüngdangner, ta NSCN/GPRN sangdong ajanga ashi.

Alima nung democracy tulutiba aser ’emerging global power’ ta pei sasa asükuma jembiba linük kati Indo-Naga political issue bentettsü asoshi temulung agüja aser nendaka inyaktsü melen yimjak nung Naga lenir tenüng menüktsütsü asoshi agency balala amshiba, kinungertem merenshiba aser osang tiazü prokshiba amala samesa mapa inyaktsü nüburtemi imlaa meliasü, ta ashi.

Tashiyim yimya amshia Naga nunger yimten temeden raksatsütsü tebilemba alinungbo, Government of India-i yimjung maparen asoshi NSCN/GPRN kodanga mejaoktsüla jaok.

GoI ajanga ashikülak yimya balala amshiba ajanga Naga nunger yimten temeden kodanga manokshitsütsü, koba puti otsü tamendak dak akang-akanga lir, ta NSCN/GPRN sangdong ajanga ashi.