Golmaal Again nung shilem agiba ya ni asoshi tetushi ulura: Parineeti Chopra

Mumbai, March 26 (Agencies): Actress Parineeti Chopra-i ashiba agi, Rohit Shetty indang film ‘Golmaal Again’ nung shilem agitsü asoshi maongka ya la asoshi tetushi tulu lir.
“Golmaal Again tangokdang onok kanga dang jangratema pelateper. Tang tashi nung iba set ya ni asoshi tajungtiba lir. Rohit aser ‘Golmaal’ film nung shilem agirtem den ni kanga jangratema mapa inyaker, aser iba ya ozü kibong amai dang kümogo,” ta Hokolbar aonung HT Most Stylish Awards nung adendang Parineeti-i ashi.
“‘Golmaal’ film ya kanga dang nüngtugu series ka lir. Kareena Kapoor-i iba film ana nungbo shilem agiogo aser tang nia iba film nung shilem agidar koba ni asoshi maongka tulu ta ni züngshir. Iba film ya kanga dang temenünütsüka lir aser iba ajanga nüburtemi kanga dang saputsü imlar,” ta laisa ashi.
Lai iba sentong nung tetsür shilem nung ‘Youth Icon of the Year’ award ngua liasü.
“Style award ka nung kü tenünga züngsemtsü ta imla maliasü, saka kü style atema ni kanga meranga inyakogo aser tanü iba award anguba atema kanga pelar. Style balala sübotsü nung ni kangabo majung saka ni tang tajungba kümdar ta bilemer,” ta lai award anguba indang jembidang ashi.
Tebur shilem nung ‘youth icon of the year’ Ayushmann Khurrana-i ngua liasü shiba Parineeti Chopra den külemi Yash Raj indang Film ‘Meri Pyaari Bindu’ nung tongti shilem agir.