Good Friday nü Digital India Day amungtsü lemtetba Meghalaya-i anemer

Shillong, April 12 (Agencies): Narendra Modi’er sorkari April 14 nü Digital India Day amungtsü telemtetba agiba anema Meghalaya Chief Minister, Mukul Sangma-i, April 14 nüji Good Friday anogo lir aser iba anogomung ya state nung Khristantem ajaki amunger, ta ashi.
Sangma-i, iba ama sentongtem nung state sorkari shilem magitsü, koba ajanga linük indang secular tangatetba raksatsür, ta ashi.
“Ni Ato kilonser dangi shidi zülutsü, kechiyong ozü nüburtem tenüng nung ni ibaji ashitsü nüngdak, talisa Khristantem bolua aliba tesem, North East tetshia jembitsü,” ta Chief Minister-i ashi.
Paisa ashiba agi, state sorkari Union Cabinet Secretary denbo official süa jembiogo.
Centre-i iba telemtetba agiba anema Mukul-i, “Parnok tebilemba onükji kechi, ta asenoki odiodia asüngdangtsüla. Temesüktep anogotem- Khristmas anogo nung Good Governance Day amunger, aser tang Good Friday anogo nung Digital India Day amunger – parnoki (BJP-i aniba NDA sorkar) minority tem ilaa kümdaktsütsü meranger asü?” ta asüngdang.
“North East nungbo parnok (BJP) mapatong ajakji tajung aser NE-i itemji agizüktsüla ta BJP-i yimya kümdaktsütsü meranger,” ta paisa ashi.
2018 küm assembly election nung takok ngua Congress maneni sorkar tashii arutsü teimla nung pai, “Meghalaya nung Congress-i sorkar tashi tait ka agütsütsü, koba ajanga state tesem ajak nung loktiliba-rongsenkettsüng nung temelenshi bener arutsütettsü,” ta ashi.