Good Shepherd Club-i ayongzüka Kohima nung merükmeju sentong ka agi

Kohima, Rongjui/September 03 (TYO): Tanü AG Colony Kohima nung The Good Shepherd Club-i “My Colony My Responsibility” omen nung ajemdaker merükmeju mapa inyakba den külemi jana indokba pongdang lema agutsü, ta ketdangsertem osang ka ajanga metetdaktsü.
Iba sentong tenzüka AG Colony Sanitation Convenor-i sarasadem aser AG Colony Chairman-i tayongzükba o jembia liasü.
Chairman-i pei aliba temeket merüka ayutsüji kanga tongtibang, ta ashiba den külemi club-i mapatong tajung inyakba atema tenüngsang agütsü.
Club züngsemtemi ghonda trok agia Mohonkhola Junction nungi Directorate of Soil & Water Conservation tashi merüktet aser jana indokba pongdang lema agutsü.
Iba dak sendakba nung club-i AG Colony nung aliba department balalai club nem tenla agutsüba atema pelaba lemsatep.
The Good Shepherd Club-isa colony nung aliba züngsemtem dang jana indokba pongdang amshiba ajanga kiyong merüka ayutsü mepishia metetdaktsü.