Google-i Cuba sorkar den Internet tezüngzüktep agir

Havana, December 13 (Agencies): Google teloki Cuba sorkar den internet amshitsü tongti tezüngzüktep ka tan Hombarnü agiba osang ka tanü, Mongolbar nü metetdaktsüogo.
“Tan Cuba sorkar den tezüngzüktep agiba sülen Communist yimsüsütsü yimya benshiba asetkong linük nung alirtemi google nungi taoba mapang nungi internet tajangzük tekaraba aser tayongba agitettsü,” ta Google madak ketdang asüba Alphabet Inc. nung mendenbuba, Eric Schmidt-i osang jangjashitsü.
Schmidt-i Google tenüng nung aser Cuba tenüng nung idakji tentetba telecommunication tongti tentet, ETECSA nung Tir, Mayra Arevich Marin nati tan tezüngzüktepji zülutepa agia liasü.
Parnok telok anati tan tezüngzüktep agiba sülen Cuba nüburtemi Gmail aser YouTube densema, Google Global Cache network kübok densemba internet tajangzük balala ayong ayonga agitettsü.
Cuba linük den tanaben sentaktepshitsü mapatong takok ngua inyaktsü nükjidong nung US Tir, Barack Obama-ia Cuba nung internet jenjang tajungba kümdaktsütsü asoshi küm 2 tejaklen maparen inyaka liasü.
Tanü tashi nung Cuba nunger kibong noklang nung shilem 5.6 tashi nung dang internet mesüra intranet amshiba osang bushitetba osang ka United Nations (UN)-ia metetdaktsüogo.
Obama-i taruba January ita Tir menden toktsüba jakdang par linük ana tsüngda shishilembatsü tesendaktep tajungba kümdaktsütsü tangatetba nung Google telok aser Cuba sorkar nati tan tongti tezüngzüktepji agiba osang angazükogo.