Google-i doodle ka enokja Beethoven nem tetushi agütsü

New Delhi, December 17 (Agencies): Alima nung ken mejemer tejungtiba rongnung ka ta züngshisang, Ludwig van Beethoven nem Google-i doodle ka parnok homepage nung enokja tetushi agütsüogo.

Beethoven tasoba anogo shingaia mejangja ajisüaka December 17 nü pa tzü sener küm 245 ajunger aser iba anogo nung pai mejemba ken kar tamaba nungi tesüba tashi tarensena metenteptsü asoshi iba doodle nung enokja lir, ta google.com nung züluja lir.

Google amshirtemi pai mejemba kentem tarensen shitak yanglutetba sülen tanabuba aser tasembuba tarensentemji yanglutsü maongka nguyonga atutsüsa iba doodle ya saya ka amai enokja lir.

Doodle nungji pai mejemba “Fifth symphony” aser “Moonlight Sonata” kentem enokja lir.

Iba doodle yanglur engineer temji Jordan Thompson, Jonathan Shneier, Kris Hom aser Charlie Gordon nunger lir aser iba design ya Leon Hong-i purapitetba lir. Nate Swinehart-i ‘Animatics/Additional Art’ asü, Tim Shneier-i piano menüngok aser Gregory Capuano-i produce asü.