New Delhi, February 25 (Agencies): Mobile web search tajungba kümdaktsütsü asoshi Google-i India nung “Accelerated Mobile Pages” (AMP) sayaogo aser iba ya ajanga smartphone nung internet ajanga asenoki metetnüba aser ngunübatem kanga tajungba aser tekaraba bushia ngutettsü.
Iba yagi mobile nung internet browse asütsü kanga jangratemtsüka kümdaktsür kechiba süra AMP dak metaloka aliba webpage temji tanga dang nungi pezüsü agi tekaraba load asür aser tersü agi data tajemba amshir, ta search engine tettsüti, Google-i sangdong ka ajanga metetdaktsü.
AMP ajanga publishers temi internet nung parnoki enoknüba article tem mashi mapang nung kecha timtem melii enoktettsü.
“Tanü nungi tenzüka Google-i mobile tem asoshi AMP webpages mela lapoktettsüsa lenmang lapoktsütsü aser ibaji ajanga tamshirtemi pei aginüba kangasa kara ngutettsü,” ta Search, vice president (engineering) David Besbris-i ashi.
Mobile nung internet kanga anüba ajanga tetsükdaktsü aika adokdaktsüba ajanga Google-i publishers aser tongtibang technology company tem den tangatettep nung AMP ya saya.
AMP ya internet atema browser aser oset ajak nung amshitettsü.
Iba den külemi tamshirtemi iba tereprangtsüa tang desktop aser mobile nung ama pei aginüba ama melenshia amshitettsü.
Nüburtemi second asem shi atar pei aginüba page load mesüra websites shibanger, ta bushisüngdang ka ajanga nguteta lir.
Ajisüaka tan sayaba AMP ajanga item tebilemtsü samadaktsür kechiba süra ibai kanga tekara lir.
India nung Network18, NDTV, India Today, The Hindustan Times aser DNA publisher temia iba inyakyim nung nungittsü tenzükogo.
You must be logged in to post a comment Login