Google-i India nung tzümetsüng ataloktsü osang metetdaktsütsü

New Delhi, February 09 (Agencies): India nung lendongtsüdong ataloktsü asoshi nübur tali renemshia lidaktsütsü nükjidong nung Google teloki India nung tzümetsüng lendong ataloktsü osang mapang jilia metetdaktsütsü mapatong tenzüktsü renemba osang ka tanü, Mongolbar nü sangoktsüogo.
“Tzümetsüng lendong osang sangoktsüba den külemi, Central Water Commission (CWC)-i observation station tenteta aliba tesem 170 dak tema nung ayongtzü tali akümba osanga nüburtemi agitettsü,” ta Google teloki metetdaktsüogo.
“Mapang jilia lendong ataloktsü osang meteta akümba ajanga küm shia nisung meyirijang jenti indang takümtem lendong balala nungi kümzükteter. Tzümetsüng lendong ataloktsü osang mapang jilia meteta akümba ajanga nüburtemi pei taküm kümzüktsüsa terenemshiba agitettsü,” ta Google India nung product manager, Payal Patel-i ashi.
Tzümetsüng aser ayongtzü timba akümba osangji desktop computer aser mobile naprongla ajanga Google web search, Google app nung Google Now cards, Google Maps aser Google Public Alerts homepage nungi angutsü.
CWC nungi nüngdakba osangtsüsang agia nüburtem nem mapang jilia tzümetsüng lendong ataloktsü osangji metetdaktsütsü renema lir.
India nung tzümetsüng lendong ya kanga bulua atalokba lendong ka lir aser mei mapang tzünglu kanga sashia aruba ajanga India nunger nisung million 30 dak temai kümshi timtem jenti ajurur.
CWC-i ashiba agi, tzümetsüng atalokba ajanga India nung kümshi alimang hectare million 7.21 shi tzü agi metsüngbanger.
Ano, tzünglu kanga sashia aruba aser tzümetsüng lendong atalokba ajanga India nung kümshi nisung 1,700 shi asüba osang bushitetba osang ka Google telokia metetdaktsüogo.
Yaküm, 2015 küma Google teloki India nung cyclone yipru lendong ataloktsü osang nüburtem dang mapang jilia metetdaktsütsü mapatong tenzüka liasü.