Google-i Modi nüngtem nung doodle tasen ka adoktsüogo

Washington, September 28 (Agencies): United States nung tentetba internet telok mongin, Google-i India Ato Kilonser, Narendra Modi pela agizükba temaitsü sayua doodle tasen ka adoktsüogo.

Tang US semdanga alisang, Modi-i par telok tesepti, Mountain View, Calfornia tsüngdong semdangba pela agizüka, Google teloki iba doodle tasenji adoktsür lir.

Narozük ama yangluba zülujang agi tenzüka ‘Google-i PM Narendra Modi pela agizüker’ o zülu densemba doodle-ji Google telok indang homepage tsünglanglen maloka yuja lir.

India lenisang, Modi-i Facebook tesep semdangba sülen Google telok indang teseptia tonga taoba Deobar nü aoba sülen par CEO, Sundar Pichai den külemi tesptiji semdanga senzükba osang jangjaogo.

Ano külen, sangküm 2016 küm nungi tenzüka Indian Railways den külemi lungjemer India nung tentetba train station 500 tashi nung nüburtem nem wi-fi angati agi agütsütsü renemba osang ka Google-i tawa metetdakja lir.