Google-i NASA atema doodle ka inoktsüogo

Delhi, July 14 (Agencies): Google-i parnok homepage nung tongtibang anogotem nung teti doodle balala inoktsür aser Mongolbar nüa NASA meyong spacecraft ka yima aoba doodle ka inoktsüogo.

Iba spacecraft ya Mongolbar nü Pluto ajanga yimogo aser ibaji ajanga scientist temi tan mezüng, iba planet tilaba tema reprangshiogo.

Ajisüaka Hombar nü spacecraft, New Horizons-i Pluto ajanga yimogo, ta olulu kar adoka liasü.

NASA nung Associate Administrator, Alan Stern-i ashiba agi, iba spacecraft ya Pluto meküta aliba jana den meyokteper khen mongui akümtsü akok. Iba planet ya 2006 küm planet tilatiba ta jangajashiogo. Bodhbar anepdang 7:49 ako nung iba spacecraft ya Pluto leni kanga anasa aotsü aser tekaraji 30,800 mph alitsü.

1970 küm ‘NASA Voyager’ spacecraft ajanga semdangba sülenbo tang mezüng Pluto semdangerba alitsü. Iba craft ya kanga mazüngi noksa tangoka aser osang bendena jajaba agi mazüngi alitsü anungji tesülenang alima dangi osang yoktetsü.

New Horizons-i alima dangi nikongdang 4:20 ako nungang signal yoktsü aser iba signal ji ghonda pongu nungang scientist tem atongtsü.

Anungji NASA-i iba tekara spacecraft ji timtem meli senzüteter asü masüar aonung 9:02 ako tashi nunga jangjatsü.

“Iba ya atema kecha nükentsüa mali, saka taonungang mapa tera adoktsü, ta Alan Stern-i ashi.

“Taonung matong tashibo spacecraft ji Pluto meküta aliba jana nung kecha timtem adok asü madokar tejangja meshitettsü,” ta paisa ashi.

Stern-i ashiba agi, mongin temi yangji aliba janaji kanga junga bushisüngdangogo aser kecha tebilemtsü tulubo mali, ta shiogo.

Ajisüaka spacecraft kaji kanga tekümdangtsü tulu lir kechiba süra Pluto aliba ‘Kuiper Belt’ nung balaka comets aser planet dang tilaba temang aika lir, ta pai ashi.

Kuiper Belt anasa yagi tanga mapang nung kodanga spacecraft modang aser New Horizons bo iba lenmang nung küm 9 dak tema tashi nung mile million asem tashi jajar.

“Onok ya memetetba tesem kati aoer,” ta Stern-i osangbenertem dang ashi.