Google-i R K Laxman bilemteta Doodle tasen ka sayaogo

Mumbai, October 24 (Agencies): Cartoonist aser asür R.K. Laxman küm 94buba tasoba anogo nüngtem nung Google-i Honibar nü parnok Home page nung Doodle tasen ka sayaogo.
Iba doodle ya Laxman akümlidang pai yangluba noksa mesüka ‘Black & White’ nung sayatsü. Doodle nungji studio ka tapu asem küma lemsar sayur—-ka mapa inyakba sabang, ka pa menden nung mener nisung ka repranga noksa yangluba aser ka nung pai yangluba noksatem nangdena ayuba tesem.
“Googe-i iba doodle kinüngbu tebu nüngtem nung sayatsüba atema onoki kanga pelar,” ta cartoonist, Laxman’er jabaso kinüngtsü, Usha Srinivas Laxman-i IANS dang ashi.
R.K. Laxman ya 1921 küm aso aser mapang talangka temang manemi lir, Pune nung aliba mozüki ka nung January 26, 2015 nü, pa arishi küm 93 nung asü.
Tang par kibong nung kinüngtsü Kamala den jabaso Srinivas, jabaso kinüngtsü Usha aser semchir Rimanika anünga lir.
Google-i doodle tasen 2,000 yangluba tarensen nung Laxman nüngtem nung yangluba ya ajak dang tasenba lir.