Google indang ‘Project Owl’ ajanga osang taila nokdangtsü

April 26, 2017 (Agencies): Osang tiazü prokshiba, tangar anema o tamajung jembiba aser Google ‘Search’ nung temolung yirutsütsüsa aser tim masüba osang agütsüba nungi nokdangtsü asoshi Google indang ‘Search engine’ nung temelenshi agütsütsü.
Google indang Search engine amshiba mapang item amala tim masüba osang nokdangtsü asoshi ‘Project Owl’ sentong tasen ka tenzükogo.
Iba amala timtem nungi kümzüktsü asoshi Google ajanga nisung telok ka densema mapa inyakdaktsür, ta osang ajanga ashi.
Company ajanga temelenshi tuluba agütsübaji, Google indang Search engine nung bushisüngdangba mapang pasasa ojang balala sayuba (auto-complete function) agienogo.
“Tarutsü nung tajangzük tuluba aser tajungba agütsütsü asoshi nükjitong yur, tanü onoki mera tasen ka agir. Iba sentong nung ‘Search ranking’ tajungba, ‘feedback’ tem indang indanga agütsüteter aser temerikba lir,” ta Google-i sangdong.
Google nung bushisüngdangba mapang tim masüba yimya mesüra ashishiteptsüla osangtem sayura, company nem indang indanga metetdaktsütsü asoshi ‘feature’ tasen inokja lir.
Google amshiba mapang tamshirtemi telangzüba agütsütsü asoshi sentong ka inoka lir. Google lapokba nung ‘line’ ka lir aser iba ‘line’ nungji kongshira tasüngdangba kar pasasa sayutsü. Aser iba ajanga tamshirtemi telangzüba balala agütsütettsü.