Google Play Store nung Taliban app ‘Alemarah’ agien

New Delhi, April 5 (Agencies) : Taliban-i nisungtem atsür arutsü atema yangluba application ka Google Play store nungi agienogo.
Iba osang ya Google atema otongdar kati metetdaktsü saka pai iba dak sendakba osang balaka mashi.
Taliban-i yangluba app ji Alemarah lir aser Android amshirtem atema yanglu. Iba app ji April 1, 2016 nü saya aser mapang tatsüka lirbo agienadok.
Iba app nung Pashto oshi enoka liasü aser iba nung Islamist telok Taliban indang osangtem aser video tem liasü.
Iba app ya alima nung nisungtem anidentsü atema technology inyakba nung shilem ka lir, ta Taliban otongdar Zabihullah Mujahed-i Bloomberg dang metetdakja liasü.
Alemarah app ji Site Intel Group-i puteta osang sangoktsü. Iba telok yagi US nungi amenoker jihadist maparen mita repranger.
Google Play Store indang developer policy nung tesempatep adokdaktsüba, ozüng alema inyakba ajungketba app tem noktanger.