Google ‘pop-up ad’ site tem merenshitsü

August 25, 2016 : Google-i pop-up advertisement adokdaktsüba website tem dak tepet inyaktsü lemtetogo.
Google-i sen timba aabaji mobile web nung ad tem inoktsüba ajanga lir.
“Onoki item ad tem menokdangner, ajisüaka ad karbo nüngdakba page kar lapokdang itemji nembanga maneni adoker aser ibaji ajanga Google amshirtem tezü tangdaktsür,” ta mongin kati ashi.
Iba ya mobile amshirtem atema timtem lir kechiba süra mobile screen ji computer ama tulu masü.
California nung amenoka aliba Google company-i anendaktsünüba ad asem yamai tuteta metetdaktsü: 1. Nüngdakba page ka lapokdang pop-up ad adoka page tesadang ka nembangba, 2. Pop up ad tama shibangerang nüngdakba reprangtsüsa akümba aser 3. Ad kar agi web browser rangben nembangba ajanga tsünglanglen tashi scroll süa lur ang nüngdakbatem reprangtetba.
Aji oda süaka Google-i pop up ad karbo amshitsü temelaba agütsütsü.
Google amshirtem nem cookies amshitsü temetettsü sayuba ad tembo menokdangtsü.
Image caption Cookie warning aser page kar lapoktsü atema arishi küm asüngdangba ajangabo takoksa bener marutsütsü.
“Google ya alima nung advertisement prokba company tulutiba rongnung ka lir, ajisüaka ibai Facebook, Snapchat aser tanga global media consumption app tem den khenyongi balaka lir,” ta IHS consultancy nung advertising research indang senior director Daniel Knapp-i ashi.
Google ajanga desktop aser mobile web nung nungittepa sen aatsü maparen nung yarir. Anungji ibai kanga junga azüoka ayutsü kanga nüngdak, ta pai ashi.