Google, Uber & Ford nungeri lokteper pasasa jajaba gari yanglutsü

New York, April 27 (Agencies): Alphabet’er Google kongsang, Ford Motor Co., Volvo cars, Uber technologies aser Lyft teloktemi külemi lokteper pasasa jajaba gari tekaraba mapang nung yanglutsü mapatong tenzükogo.
Tan tentetba ‘Self-Driving Coalition for Safer Streets’ teloktep tenteti yimsüsür aser nübur naprong den tangatettep nung nüburtem nem tajangzük bener arutsütsüsa pasasa jajaba gari tekaraba mapang nung yanglutsü alizüng ayuba osang ka Reuters osangia metetdaktsüogo.
Tentet tasenba indang okatsür aser otongdar asütsü asoshi taoba US National Highway Traffic Safety Administration (NHTSA) ketdangser, David Strikland shimba osanga jangjaogo.
“Sorkari latetba temzüng ozüngi melaba ama gari yanglutsü nükjidong nung nungdakba yimsüsürtem den amalitepa pasasa jajaba gari yanglutsü aser iba alizüng asangsang nung ajangzükba ajanga nüburtem nem tajangzük tulu bener arutsütsü,” ta Strickland-ia metetdaktsü.
Pasasa jajaba gari yanglutsü technology tasen tajungba küma amshitsü nükjidong nung tapet temzüng ozüng latettsü asoshi Google teloki ita ishika tejaklen nungi tenzüka US yimsüsürtem ajungshiba osanga angazükogo.