Google Voice Assistant agütsüba sülen Reliance JioPhone amshir trokben agi timba kümogo

Tsüklai 17, 2018 (Agencies): Reliance Jio Phone tem nung 2017 Luchii (December) nung Google Voice Assistant agüja liasü aser iba sülen iba phone amshiba trokben agi tali kümogo, ta company sangdong ka ajanga metetdaktsü. Linük nung feature phone amshirtem ajungkettsü mechi nung Google puri taoba küm Luchii 5 nü Reliance JioPhone tem nung Voice Assistant amshitettsüsa maongka agütsütsü sangdonga liasü. Feature phone tem rongnung Voice Assistant feature iba phone nung mezüngbuba agütsü.
“Onoki Luchii nung Google Assistant feature phone nung mezüngbuba amenokba sülen taoba ita pezü tsüngda nung Reliance JioPhone amshir trokben agi timba kümogo,” ta Google, Next Billion Users Team, Vice President Caesar Sengupta-i blog post ka ajanga metetdaktsü.
“Iba ya semi-literate mesera illiterate nisung aika aliba ajanga dang masü saka computer keyboard mamshibar atema typing asütsü tasak lir,” ta paisa ashi. Web content ya shilem 50 bo English nung lir ta asatetogo aser Hindi ya alima ajunga nung nüburtemi timtima jembiba fourth language ang lir aser iba oshi ya web content atema top 30 languages nunga densema mali.
“India amala linük ka nung internet amshirtemi English dang nungi pei oshi nungang tamshinüba, anungji Internet amshiba yimya atsülangtsü asoshi oshi ya tetsükdaktsü tuluka asütsü,” ta paisa shisem. Google puri local content amshitsü asoshi akhangba ajanga oshi amshiyim nung memedem aliba melenshitsütsü, ta amanger aser iba ajanga Internet ya oshi ajak nung amshitettsüsa akümtsü.
Sengupta-i ashiba agi, taruba internet amshir billion temi internet ji tayongba amshitettsü, kechiyong asenok ama PC nung artificial commands tem ajak angazüktsü parnok asoshi nüngdak madoktsü. Internet indang tarutsü ya next billion users kaboma nung lir aser latest generation ji Brazil, China, India, Indonesia aser Nigeria nunger amala nung lir.