Goonda lima masü Khristan lima

Nagaland nung ozüng raksaba mapatem azüoktettsü asoshi ano ozüng tesashiba ka August ita 31 tashi nungbosa latettsüla ta Dimapur nung tenteta aliba Public Action Committee-i state government nem takangba agüja aliba onük jagi tanü Nagaland tensa tia sayur. Iba ama tensa tamajungji nübortem aikati majurui alitsüa akok, anungji memetettsü saka shishilembadak aser mapa inyakdak asenok ajaki meteta aser memettei sen talila agütsür, kechiyong jangotsü aser osettsüset ayoker, yanglur aser bentsürtemibo kodanga pei akoksatsüsa mayoktsü, meyanglutsütsü aser mebentsütsü. Iba amaji asen lima nung ozüng shitak mamshitetba agi anogo shia asenok mapa ka nung mesüra ka nungbosa akoksadagi. Dimapur nung Public Action Committee purtemi ashiba tensaji ajak atema tetsübutsüka lir, kechiyong Dimapur ya prangpong amer tashiyim amshiba teloktemi yimsü asür. Item tashiyim agi saru sarur teloktemji Naga nunger linük tenzükertem telok balala tenüng amer inyakertem lir. Parnok asoshibo tang Cease fire aliba ya item tashiyim mapa sademsadema inyaktsü asoshi temelaba angu amai inyaker ta PAC purtemi ashibaji tamajung mapatem anema adokba tasütait ola ka lir. Atangji, linük tenzükba mapaji saru medeniang meinyaktettsü, ajisüaka tang amai telok zünger mezüngmai kasa dokan nung, kasa mapa inyakdak aser ka nisung dang saru meshijen meshira, shingaia maremtsü aser kecha agia metizüktettsü. Ano, Nagaland asoshi tamajunhgtibaji mapang mapang shia Nagaland Voluntary Consumers’ Organisation (NVCO)-i aija metetdaktsüba ama, linük tenzükertem tenüng nung dang masü saka Nagaland police-temi dena parnoki anükba check gate shia nung saru saruba mapatemji asütsü. Iba jagi balaka Nagaland police tenüng menükba dang masü saka Nagaland ajunga topur mejungi kümdaktsür. Item ama ozüng raksaba mapartem agi nübortem kangshir asünungji, taküm 2020 küm August 31 tashi nungbo Nagaland nunga tashiyim mapatem nokdangtsü asoshi “Maharashtra Control of Organised Crime Act mesüra ” Goonda Act” ozüngtem ama latettsüla ta Public Action Committee-i metetdaktsüba nungji, rasaa mashiyonga Nagaland tensa tiaji tetsübutsüka angur. Aji oda, Nagaland topur ajungba agi alima tesem balala nungi raliwalirtem arutsüsa ozüng tajung yanglutsü melen asenokbo ” Goonda Act” latettsüang rongdak nüngdak akümbaji temulung ashitsüka lir. Iba ama tensa tia ka nung asenok alitsüsa akümbaji tashiyim agi saru sarurtem kija tai masü saka asenok ajak tai lir. Asenoki mapa meinyaki chiyongnüba agi, junga mazüng memetet ser tezülen nungi mapai aiba agi, tashiyim agi takok angutsü merangba agi aser mapa kecha nunga indangindanga meinyaktetba agi tanü asen lima ya ‘Khristan lima’ masü saka ‘Goonda lima’ kümdaktsüogo. Joko, goonda mekümra Nagaland nungbo mapaa mangutsü aser takoka mangutsü. Iba jagi goonda kümer saru sarua senzübaji dang masü saka mapa ajak ‘goonda type’ agidang inyaker. Item ajakji tawa Nagaland angh-i Chief minister dangi züluba shidi nung shisema lir. Ajisüaka, Nagaland nung ‘Goonda Act’ latetba agibo goonda mapatem mazüoktettsü. Tanü Nagaland majungba ya ozüng raksar alentsüsa ozüng lateta makaba agi masü saka ozüng mamshitetba agi lir. Tatsüba agi, asenok tebilemtsü ya ozüng makaba tebilemtsü masü saka ozüng raksaba aser ozüng mamshitetba tebilemtsü lir. Aji oda, August 31 tashi nungji Nagaland nung goverment-i PAC purtemi akangba amaji ‘Goonda Act” latetyonga, aji maka küma amshir melira koda (?) ta asenok ajaki bilemdangdi. Shitakba agibo, Nagaland ya goonda telok aliba agi ozüng tesashi nüngdakba state ka masü saka goonda telok maliba agi ozüng menüngdakba lima ka akümtsüsa asenok alitsüla. Tsüngremi dang mulungra, Nagaland ya Goonda lima masü saka Khristan Lima ka asütsüsa tekaratiba nung Naga yimten tebilemtsü ya tatem kümjang aser onok mulungjang teindang küma metongshijang ta asenoki kanga akanga sarasademdi.