Gorakhpur hospital nung asürtem 63 jungogo, CM-i senden ayong

Gorakhpur, August 12, 2017: Gorakhpur nung aliba Baba Raghav Das (BRD) Medical College hospital nung ‘encephalitis’ tashidak agi shiranger tanurtem amongba noksa nung angur. Iba hospital nung aliba Children’s ward nung oxygen maliba ajanga tanur aika süogo.

New Delhi/Lucknow, August 12 (Agencies): Gorakhpur nung aliba Baba Raghav Das (BRD) Medical College hospital nung encephalitis tashidak agi shiranga asür 63 jungogo.
Tanepa iba hospital nung liquid oxygen maliba ajanga tanur ana süogo.
Yashi osang ka ajanga, iba hospital nung encephalitis tashidak agi nisung 30 süogo, ta sangdonga liasü. BRD hospital osang ajanga ashiba agi, tesüiba anogo pongu tsüngda (August 7-11) iba hospital nung nisung 60 asü. Asürtem tsüraburtemi, doctortemi tanurtemji junga meyarir aser mozü magütsür, ta tai tonglokja lir.
Iba dak sendakba nung tanü Uttar Pradesh Chief Minister, Yogi Adityanath-i rongdak senden ka ayonga liasü, iba sülen minister temi BRD Medical College semdang.
Ano Lucknow nungi osang ka ajanga ashiba agi, Baba Raghav Das Medical College nung tanur aika asüba sülen Honibarnü Uttar Pradesh sorkari college principal mapa nungi anentsüogo.
Ajisüaka osangbenertem den jembidang principal jagibo, “Tai maket tanur aika asüba atema ni kuli agia kü sasa mapa nungi sodi meshi,” ta metetdaktsü.
Lucknow nung osangbenertem den jembidang Medical Education Minister, Ashutosh Tandon-i, Principal Secretary leniba nung committee ka tenteta iba tatalokba bushisüngdangtsü tuyuogo, aser osang agütsüba sülen sorkari tim teinyaktsü inyaktsü, ta metetdaktsü.
Yashi Gorakhpur district magistrate, Rajeev Rautela-i, iba hospital nung ghonda 48 tsüngda tanur 30 tashi asü, ta metetdakja liasü.
Ajisüaka state Health Minister, Siddharth Nath Singh-ibo, August 7 nü nungi tenzüka tang tashi nung tashidak balala ajanga tanur 60 süogo, ta metetdaktsü.
Ato kilonser, Narendra Modi-ia item tatalokba mita reprangdar aser pai Central aser state sorkar naprong den metetpeladar, ta osang angazüker.
Union Health Minister, JP Nadda-i Minister of State for Health, Anupriya Patel aser Health Secretary, CK Mishra na dang Gorakhpur-i oa iba hospital semdangtsü tuyuogo.
Nadda-isa state health department dang iba osang agüjang ta metetdaktsüogo.
Item tatalokba nung ajemdaker state nung opposition party temi Chief Minister, Yogi Adityanath-i aniba sorkar aitsüdar, iba den külemi state Health Minister aser Medical Education Minister naprong minister menden nungi anendakjang ta takhangba agütsüdar.